БНАСАУ-аас Монгол Улсад суух шинэ Онц бөгөөд Бүрэн эрхт Элчин сайд Ли Чоль Гван үүрэгт ажилдаа орж байна. Тэрээр өнөөдөр Монгол Улсын Ерөнхийлөгч Ц.Элбэгдоржид итгэмжлэх жуух бичгээ барилаа.
Монгол Улс, БНАСАУ нь уламжлалт найрсаг харилцаатай орнууд бөгөөд, сүүлийн жилүүдэд харилцаа идэвхжиж, төлөөлөгчид харилцан солилцох явдал нэмэгдэж, харилцан ойлголцол гүнзгийрч, олон улсын тавцанд бие биеийн байр суурийг илүү ойлгож хамтран ажиллаж байгаа билээ. МУ-ын Ерөнхийлөгч, өнгөрсөн 60 гаруй жилийн турш хөгжиж ирсэн энэхүү харилцааг Монгол улс байнга хүндэтгэж, хоёр талын харилцааг боломжтой бүх салбарт хөгжүүлэхийн төлөө байгаа гэдгээ илэрхийлэв.
Тэрээр, “Монгол улс БНАСАУ-тай олон улсын байгууллага, бүс нутгийн хүрээнд хамтын ажиллагаагаа гүнзгийрүүлэхийг зорьж, олон улс, бүс нутгийн асуудлуудаар байнга зөвлөлдөж, харилцан ойлголцож, Солонгосын хойгт энх тайван, тогтвортой байдлыг хангахын төлөө хамтран ажиллахыг эрхэмлэдэг” гээд, өмнөх Элчин сайдуудын жишгээр, 2 орны харилцааг өргөжүүлэхийн төлөө идэвхтэй, амжилттай ажиллахыг хүслээ.
Элчин сайд Ли Чоль Гван, 2 орны харилцаа Төрийн тэргүүнүүдийн зүгээс ихээхэн анхаарсны хүчинд улам бүр өргөжиж байна гэж дүгнээд, Элчин сайдаар ажиллах хугацаандаа уламжлалт найрсаг харилцааг бэхжүүлэхийн төлөө хүчин зүтгэл гаргах болно гэлээ.
Элчин сайд Ли Чоль Гван нь ЗХУ дахь ЭСЯ-нд атташе, Узбекистан улсад Онц бөгөөд Бүрэн эрхт Элчин сайдаар томилогдон ажиллаж байсан туршлагатай юм байна.
