Монголын уламжлалт анагаах ухааны
анхдугаар чуулганд оролцогсдод
Таван мянганы түүхтэй Монголын уламжлалт анагаах ухааны арвин сан хөмрөгийг өртөөлөн авч, хөгжүүлэн бадраах эрхэм үйлст нэгэн үзүүрт сэтгэлээр зүтгэж ирсэн үе үеийн эмч, сувилагч, оточ, маарамба, эрдэмтэн судлаачид болон энэхүү чуулганд уригдан ирсэн бүх хүнд чин сэтгэлийн мэндчилгээ дэвшүүлж, эрүүл энх сайн сайхныг хүсэн ерөөе.
Монгол түмний нэн эртнээс эдүгээ хүртэлх анагаах эрдмийн охь, олон үеийнхний нөр их зүтгэлийн хишиг буяныг арвижуулан хямгадаж, алдаршуулан өвлүүлж, нүүдэлчдийн соёл иргэншлийн оюуны гайхамшиг болгон өнөөгийн бидэнд өвлүүлж ирсэн эгэл жирийн эм баригчаас эхлээд эрдэм төгс бандида, эрдэмтдийн оруулсан хөдөлмөр зүтгэлд Монгол Улсын Төрийн тэргүүн би гүн хүндэтгэл илэрхийлж байна.
Монголын уламжлалт анагаах ухаан бидний өвөг дээдсийн сэтгэлгээний цар, нөр их хөдөлмөрийн үр шимээр цогцлон бүрдэж, өөрийн орны байгаль цаг уур, нүүдэлчин ардын соёл иргэншлийн онцлог байдлыг тусган, өнгөрсөн цагийн түүхэн шалгуурыг туулж ирэхдээ амар хялбар зам туулаагүй ч эдүгээ монголчуудын эрүүл амьдрах ухааны бүхэл бүтэн тогтолцоо болж, хүн амын эрүүл мэндийг сахин хамгаалах үйлсэд үнэтэй хувь нэмрээ оруулсаар ирснийг бахархан тэмдэглэе.
Уламжлалт анагаах ухааныг эрүүл мэндийн тусламжийн нэгэн эх сурвалж, нөөц болгон ашиглаж, орчин цагийн шинжлэх ухаантай зүй зохистой хослуулан хөгжүүлж, эмчилгээний аюулгүй байдал, эм тангийн үр дүнтэй, зохистой хэрэглээг хангаж ажиллах нь манай эрүүл мэндийн салбарын нэг чухал зорилт мөн.
Үүгээр зогсохгүй хүн төрөлхтний өмнө тулгамдаад байгаа халдварт бус өвчин, шинээр сэргэж буй халдварт өвчин, сэтгэцийн эрүүл мэндийн өнөөгийн байдал , хүн амын шилжилт хөдөлгөөний хурдсал, хотжилт, цөлжилт, дулаарал, агаарын бохирдолт зэргээс улбаатай нийгэм, орчны өөрчлөлтийн олон асуудлыг шийдвэрлэхийн төлөө Монголын анагаах ухааны тамир, шандсыг сориход Та бүхний хичээл зүтгэл их юм.
Уламжлалт анагаах ухаан ардчилсан өөрчлөлтийн үр дүнд сэргэн хөгжиж, улмаар “Монголын уламжлалт анагаах ухааныг хөгжүүлэх талаар төрөөс баримтлах бодлого”-оо батлан, үндэсний бодлоготой орон болж чадсан амжилтаа бататгаж, цаашид эрүүл мэндийн оношлогоо, эмчилгээ, эмийн ургамал, амьтан, эрдсийн гаралтай эмт бодисын судлал, үйлдвэрлэлийг олон улсын жишигт хүртэл хөгжүүлэх шаардлагатай байна.
Тус анхдугаар чуулган уламжлалт анагаах ухааны хөгжлийн өнөөгийн байдал, бий болсон материаллаг бааз, хүний нөөц, эрдэм судлалын ажилд бодитой үнэлэлт, дүгнэлт өгч, уламжлалт анагаах ухааны гүн ухаан,онол, арга зүйн судалгааг шинэ шатанд гаргаж, олон улсад өөрийн орон зайгаа баттай эзэгнэх их үйлст өндөр амжилт гаргана гэдэгт итгэлтэй байна.
Чуулганы ажиллагаанд амжилт хүсье.
Монголын уламжлалт анагаах ухааны алтан аргамж бат бэх байх болтугай.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
