Лалын Бүгд Найрамдах Пакистан улсаас манай улсад томилогдсон Элчин сайд ноён Масүүд Хаан Монгол Улсын Ерөнхийлөгчид итгэмжлэх жуух бичгээ барилаа.
Ази тивийн орнуудтай харилцах хүрээнд, Пакистан улстай харилцаа, хамтын ажиллагаагаа өргөжүүлэн хөгжүүлэхийг зорьж байгаа гэдгээ Монгол Улсын Ерөнхийлөгч Ц.Элбэгдорж уулзалтын үеэр хэлсэн. Ерөнхийлөгч, худалдаа, эдийн засгийн харилцааны боломж бүрэн ашиглагдахгүй байгааг дурдан, энэ чиглэлд илүү хүчин чармайлт гаргаж ажиллах хэрэгтэйг дурдлаа. Манай улс 1999 оны үед Пакистан улсад нийт 400 орчим мянган долларын бараа экспортолж байсан бол сүүлийн жилүүдэд экспортын хэмжээ эрс буурч байгаа юм байна.
Ерөнхийлөгч, манай 2 орон, олон талт хамтын ажиллагааны хүрээнд, харилцан бие биеэ дэмжиж ирсэн бөгөөд, ШХАБ, АСЕМ зэрэг олон улсын бүтцийн хүрээнд мэдээлэл харилцан солилцох боломтжой талаар мөн ярилаа. Пакистан улс хүний нөөцийг хөгжүүлэх чиглэлээр зохион байгуулдаг сургалтандаа монголын төрийн ажилтнуудыг сургаж байсан, цаашдаа ч үүнийг сэргээн үргэлжлүүлэх хүсэлтэй байгаагаа мөн илэрхийллээ.
Элчин сайд Масүүд Хаан, Монгол Улсын Ерөнхийлөгчийн хэлсэнтэй санал нэг байгаагаа илэрхийлээд, “Түүхээс улбаалан Монгол бол Пакистанд танил дотно орон юм. Пакистанд Хаан, Чингис гэдэг нэртэй хүмүүс олон бий” гээд, хамтын ажиллагаа, найрсаг харилцааг улам бүр өргөжүүлэхийн төлөө чармайн ажиллах болно гэлээ.
2007 онд Пакистанд Монгол Улсын өргөмжит консулын алба байгуулагдсан нь хоёр орны харилцаанд чухал алхам болсныг энэ уулзалтын үеэр санал нэгтэй ярилцлаа.
