Монгол Улсын Ерөнхийлөгчийн санаачилгаар “Архигүй Монголын төлөө хамтдаа” аяны хүрээнд Ерөнхийлөгчийн зөвлөх Р.Болд, “Архи тамхины шалтгаант эмгэг судлалын төв”-ийн тэргүүн Ж.Цогтсугар нар нийслэлийн Баянгол дүүргийн Засаг даргын тамгын газартай хамтран “Монгол хүнээ хайрлая” сэдэвт лекц, уулзалт зохион байгууллаа.
Уулзалтад тус дүүргийн ИТХ-ын газрын дарга нар болон хороодын засаг дарга нар, иргэд өргөнөөр оролцсон юм. Эхлээд Ерөнхийлөгчийн зөвлөх Р.Болд хэлэхдээ, “Одоогоос яг жилийн өмнө Монгол Улсын Ерөнхийлөгч архи хэрэглэдэггүй Монгол Улс болъё гэсэн уриалга гаргасныг та бүхэн мэдэж байгаа. Архи бол монголын бахархалтай зохицохгүй, монголчуудын амжилттай нийцэхгүй, энэ цаг мөчөөс эхлэн миний аяганд архи байхыг би хүлээн зөвшөөрөхгүй хэмээн ард түмнээ архины хэрэглээнээс татгалзахыг уриалсан билээ.
Энэхүү уриалагыг Ерөнхийлөгчийн Тамгын газар олон түмэнд түгээн дэлгэрүүлэх олон ажлыг өнгөрсөн хугацаанд хийж ирлээ. Үүний дагуу олон зуун байгууллагын дэмжлэг өрнөж “Архигүй Монголын төлөө хамтдаа” хэмээх Үндэсний сүлжээ байгуулагдлаа.
Хөдөө орон нутагт энэхүү аян эрчимтэй явагдаж өдгөө нийслэлийн бүх дүүрэгт ажиллахаар бэлтгэгдэж байна. Ажлын хүрээнд олон газраар явж иргэдтэй уулзлаа. Орон нутгийн удирдлагууд архигүй хамт олон болох, цаашид архи хэрэглэхгүй байх тухай ард түмнийхээ дунд амлалт аван ажиллаж өөрсдөөрөө үлгэрлэн дагуулах сайн жишгийг бий болгосоор байна” гэлээ.
Мөн тэрээр, “Архины хэрэглээний тал дээр нэлээн ул суурьтай хязгаарлалт бүхий заалтуудыг оруулсан шинэ хуулийн төслийг боловсруулж байгаа. Архи хэрэглэдэггүй анхны аймаг Завхан аймаг болсон. Баянгол дүүрэг хамгийн анхны архи хэрэглэдэггүй дүүрэг болоосой хэмээн уриалж байгаагаа хэлье” гэв.
Уулзалтад оролцсон хүмүүс Ерөнхийлөгчийн “Архигүй Монгол” санаачилгыг дэмжин ажиллахаа илэрхийлээд энэхүү үйл ажиллагааг улам өргөтгөн хороодын иргэдийн дунд явуулж өгөхийг хүссэн юм.
Мөн уулзалтад оролцогчид ард иргэдийг амар тайван орчинд аж төрөхөд сөргөөр нөлөөлж буй гол зүйл бол архидалт бөгөөд үүнээс үүдэлтэй гэмт хэрэг ихээр гарах болсон явдал. Үүний эсрэг Баянгол дүүргийн цагдаагийн хэсэг болон замын цагдаагийн газар бусад хууль хяналтын байгууллагууд, ТББ-уудтайгаа хамтран олон талт ажил зохион байгуулж байгаа. Ялангуяа ЕБС-иудын сурагчид, оюутан залуусын дунд хууль сурталчлах, архидалтын эсрэг сурталчилгааны ажлуудыг эхлүүлээд байгаа гэлээ.
Уулзалтад оролцсон иргэд баяр ёслол, амралт зугаалгыг архигүй тэмдэглэх тухай хууль гаргахыг дэмжих тухай мөн архи худалдаалах зөвшөөрөл хавтгайрч байгааг шүүмжилж байв. Тодорхой жишээ гэвэл 6000 хүнтэй хороонд л гэхэд 13 газар өдөр шөнөгүй согтууруулах ундаа худалдаалж байгааг нэн даруй зогсоох шаардлагатай байгааг дурьдаж байв.
