Өнөөдөр Монгол Улсын Ерөнхийлөгч Цахиагийн Элбэгдоржид Бүгд Найрамдах Латви Улсаас Монгол Улсад суух Онц бөгөөд Бүрэн эрхт Элчин сайд хатагтай Ингрида Левренс ИЖБ-ээ өргөн барилаа.
ИЖБ-ээ өргөн барьж үүрэгт ажилдаа орж буйтай нь холбогдуулан Ерөнхийлөгч Ц.Элбэгдорж хатагтай И.Левренсд баяр хүргэж хоёр орны хамтын ажиллагааны талаар санал солилцов.
Латви Улс нь хуучин ЗХУ-ын бүрэлдэхүүнд байсан орнуудаас хөгжлийн өндөр түвшинд хүрч, Европын Холбоо, НАТО-д 2004 онд элссэн орон бөгөөд Монгол Улс Европын Холбоотой идэвхтэй харилцах бодлогынхоо хүрээнд Европын уламжлалт харилцаатай орнуудтай харилцаа, хамтын ажиллагаагаа гүнзгийрүүлэн хөгжүүлэх сонирхолтой байгаагаа Монгол Улсын Ерөнхийлөгч уулзалтын үеэр илэрхийлсэн юм.
Мөн Ерөнхийлөгч Латви Улсын Ерөнхийлөгчийг тааламжтай цагтаа Монгол Улсад айлчлахыг уриад хоёр талын худалдаа, эдийн засгийн хамтын ажиллагааг хөгжүүлэх талаар хүчин чармайлт гаргаж ажиллахыг хатагтай И.Левренсд санал болгосон юм.
Уулзалтын төгсгөлд, 1990 он хүртэл Латвийн Рига зэрэг хотуудад монгол оюутнууд суралцаж байсныг Ерөнхийлөгч дурьдаад энэ уламжлалыг сэргээн оюутан солилцох, мөн мэдээллийн технологи хурдацтай хөгжиж буй тус улсын туршлага Монгол Улсын хувьд онц чухал гэдгийг тэмдэглэн хэлэв.
