Эль-Кувейт хот дахь Исламын урлаг соёлын музейд хадгалагдаж байгаа дэлхийн үнэт ховор эдлэлүүд, тэр дундаа Могул хааны үед харьяалагдах соёлын өв дурсгалтай Монгол Улсын Ерөнхийлөгч Ц.Элбэгдорж танилцлаа. Исламын урлаг соёлын эртний эдлэлийн музей нь Кувейт Улсын эрх баригч Аль-Сабахын гэр бүлийн хувийн цуглуулга дээр үндэслэн байгуулагджээ. Одоогийн Эмирийн ууган хүү Шейх Насер Сабах Аль-Ахмед Аль-Сабах өөрийн эхнэр Гүнж Хисса Сабах Аль-Салемын хамтаар дөрөвдүгээр зуунд хийгдсэн Мамлюкын дурсгалт зүйл худалдан авснаар тэдэнд эртний эдлэлийн музей байгуулах санаа төржээ. Ингэж уг музейн үндсийг тавьсан байна.
Өнөөдөр тус музей 39 мянган эртний эдлэлтэй, лалын урлаг соёлын хамгийн алдартай музей болсон аж. Энэхүү үзэсгэлэн дэлхий дахинд зөвхөн лалын урлаг соёлыг сурталчилдаг төдийгүй лалын шашинт орнуудыг эзэлж өөрсдийн ноёрхлоо тогтоосон хүчирхэг хаадын эдэлж хэрэглэж байсан зүйлсийг нэгэн дор цуглуулснаараа алдартай юм. Тухайлбал, Могулын эзэнт гүрний хаад, Төмөр хааны удмынхны эдэлж хэрэглэж байсан зүйлс энд байна.
Зөвхөн Могулын эзэнт гүрний үед хаад, ноёд, хатад, цэрэг дайчдын хэрэглэж байсан зүйлсээс л гэхэд 500 орчим цуглуулгатай юм. Тэдгээрийн дотроос 12 кг цэвэр алтаар хийсэн зоос, дайчдын нум сум харвахдаа хуруундаа хийдэг байсан алт, мөнгө, хаш хамгаалалтууд, арга билгийг билэгдсэн хос загасны дүрс бүхий эрдэнийн чулуутай гоёл зүүсгэлүүд ховор гайхамшигтай үзмэрийн тоонд орж байна. Ихэнх үзмэрийг одоогоос 20 жилийн өмнө Иракийн довтолгооны үед алдсан ч Аль-Сабахын гэр бүлийнхэн буцааж цуглуулж олж авах тал дээр онцгой анхаарчээ. Хамгийн сүүлд Лондонгийн дуудлага худалдаанаас Могулын хаан Жалал Аддин Акбарын үнэт эрдэнэс шигтгэсэн хутгыг авч, музейн үзмэр болгожээ.
Музейн ховор нандин үзмэрүүдийг дэлхийн 14 том хотод дэлгэн үзүүлсэн байна.
Исламын урлаг соёлын музей нь зөвхөн үзмэрээ дэлгэдэг төдийгүй өөрийн шашны урлаг соёлын түүхийг сурталчлах зорилгоор лекц, урлагийн тоглолт зэргийг зохион байгуулдаг бөгөөд сар тутмын сэтгүүл гаргадаг юм байна.
мэдээний том зургийг энд дарж татаж авна уу
http://share.gogo.mn/aLeRWoPXkU73131323405792/2011_12_07.rar
мэдээний дүрсийг энд дарж татаж авна уу
http://share.gogo.mn/76Pqhfeg9H43921323326610/12-08soyliintow.wmv
