Монгол Улсын Ерөнхийлөгч Цахиагийн ЭЛБЭГДОРЖ-ийн Кувейт Улсад хийж байгаа албан ёсны айлчлал үргэлжилж байна. Кувейт Улс газрын тос, байгалийн хийгээс олсон орлогоо зүй зохистой зарцуулах талаар тусгай бодлого хэрэгжүүлдэг юм байна.
Тухайлбал Хойч үеийн төлөөх сан хэмээн улсын тусгай сан байгуулж, түүндээ баялгийн орлогын 10 хувийг төвлөрүүлдэг байна. 1953 онд үүсгэн бий болгосон энэхүү сангийн хуримтлалыг өнөөдөр бүтээн байгуулалт, дэд бүтэц, боловсрол, эрүүл мэндийн салбарт зарцуулж байна.
Кувейт иргэн эрүүл мэндийн үйлчилгээг үнэ төлбөргүй хүртэж, гадаадын их дээд сургуульд сурах бол улсаас тэтгэмж олгох гэх мэт “Хойч үеийн төлөөх сан”-гаар дамжуулж баялгийн үр шимийг иргэдэд тэгш хүртээмжтэй хүргэх бодлого хэрэгждэг ажээ.
Мөн дэд бүтэц, зам, эрчим хүч, цэвэр усны нөөцийн асуудалд онцгой анхаарч байна. Үүний нэг жишээ болох Персийн буланд баригдаж буй шинэ төмөр замын бүтээн байгуулалттай Ерөнхийлөгч Ц.Элбэгдорж танилцлаа. Уг төмөр зам нь хурдны авто замтай зэрэгцээ баригдаж буй бөгөөд Кувейтээс эхэлж, Иран, Казахстан, Оросын газар нутгаар дайран өнгөрөх юм.
“Транс Сибирийн төмөр замтай зэрэгцүүлж хөндлөн барих энэ төмөр зам олон улсын тээврийн нэгэн шинэ шийдэл болох юм” гэж Кувейт Улсын Эмирийн Тамгын газрын сайд Шейх Насер Сабах Аль-Ахмад Аль-Сабах хэллээ.
Кувейт Улсын хөгжлийн суурь болсон газрын тосны салбар нь ДНБ-ий тал хувийг, экспортын орлогын 95, төсвийн орлогын 95 хувийг бүрдүүлж байна. Газрын тос экспортлох хэмжээгээр булангийн орнуудын дунд гуравт орж байна. Нэг хүнд ногдох ДНБ-ий хэмжээ 48900 ам.долларт хүрчээ.
Мэдээний том зургийг энд дарж татаж авна уу
http://share.gogo.mn/WPR2Km4gcJ84051323515708/2011_12_10.rar
