Монгол Улсын Ерөнхийлөгч Ц.Элбэгдорж, НҮБ-ын Ерөнхий нарийн бичгийн дарга Бан Ги Мүн нар өнөөдөр Доха хотноо уулзлаа. НҮБ-д гишүүнээр элссэнээс хойшхи 50 жилийн хугацаанд Монгол Улсын хүрсэн үр дүнд сэтгэл ханамжтай байдгаа Ерөнхийлөгч, Ерөнхий нарийн бичгийн дарга нар харилцан илэрхийлэв.
Монгол Улс, НҮБ хамтран Далайд гарцгүй хөгжиж буй орнуудын судалгааны төвийг Улаанбаатар хотноо нээх талаар харилцан тохирсон бөгөөд энэхүү үйл ажиллагааг эхлүүлэх талаар ажиллаж байгаагаа хоёр тал дахин нотоллоо.
“НҮБ-ын Ерөнхий Ассамблейн энэ оны ээлжит чуулганы үеэр манай улс Ардчилсан орнуудын хамтын нийгэмлэгийг даргалах хүрээнд ардчиллын боловсролыг дэмжих, авлигыг үл тэвчих чиглэлээр олон улсын хэмжээний санаачилгууд гаргаад байгаагаа мэдэгдсэн билээ. Эдгээр санаачилгуудыг ажил хэрэг болгоход дэмжлэг үзүүлэхийг эрхэм Ерөнхий нарийн бичгийн дарга танаас хүсч байна” гэж Ерөнхийлөгч хэлэв.
Ерөнхийлөгч НҮБ-д ажилладаг монгол хүмүүсийн тоог нэмэх хүсэлтэй байгаагаа илэрхийлсэн. Өндөр боловсролтой, сайн бэлтгэгдсэн боловсон хүчин монголд олон байгаа учраас энэ асуудлыг анхааралдаа авах болно гэдгээ ноён Бан Ги Мүн хэллээ.
Тэрээр “Ерөнхийлөгч таны зүгээс ардчиллын боловсролыг бэхжүүлэх хүрээнд гаргасан санаачилгууд бусад улс орны төр, засгийн тэргүүн нараас дэмжлэг авч буйд би талархаж байна. Өнөөдөр таны энэхүү хурлын индэр дээрээс хэлсэн боловсролоор дамжуулж үл ойлголцлыг байхгүй болгох санаа маш чухал юм” гэв. Уур амьсгалын өөрчлөлтийн асуудлаар Монгол Улсын гаргаж байгаа санаачилгуудыг дэмжиж ажиллахаа Ерөнхий нарийн бичгийн дарга Бан Ги Мүн дахин нотоллоо.
“Тогтвортой хөгжлийн талаар бид сүүлийн үед маш их ярьж байгаа ч дэлхийн дулаарал, эрчим хүчний нөөцийн талаар мартаж болохгүй. Энэ чиглэлээр шинэ чухал шийдлүүдийг гаргахад, аливаа санаачилгыг дэмжихэд Ерөнхийлөгч та анхаарлаа хандуулна гэж итгэж байна” гэж тэрээр бас хэлэв.
НҮБ-ын Энхийг сахиулах ажиллагааны хүрээнд хамтын ажиллагааг өргөжүүлэх, техникийн туслалцаа үзүүлэх талаар харилцан санал солилцлоо.
Мэдээний том зургийг энд дарж татаж авна уу.
http://share.gogo.mn/kvNg96wrl319221323669241/2011_12_12zurag.zip
Мэдээний дүрсийг энд дарж татаж авна уу
http://share.gogo.mn/XsQb6561Ql79881323676397/2011-12-12ban.wmv
