2009 оны 10 дугаар сарын 2-ны өдөр Монгол Улсын Ерөнхийлөгч Цахиагийн Элбэгдорж Монголын нийт тариаланчдад зориулж мэндчилгээ дэвшүүлээ. Түүний мэндчилгээг Тамгын Газрын дарга Д.Дорлигжав, Ерөнхийлөгчийн Олон нийтийн харилцаа, нийтлэг бодлогын А.Ганбаатар, Хот, хөдөөгийн хөгжлийн бодлогын зөвлөх Л.Эрхэмбаяр нар ХХААХҮЯ-ны сайд Бадамжунай болон албаны бусад хүмүүсийг хүлээн авахдаа гардуулан өгөв.
Мэндчилгээ гардуулан өгөх уулзалтын үеэр салбарын сайд газар тариалангийн цаг үеийн байдлыг танилцуулав. Одоогийн байлаар хадлан хураах ажил ид явагдаж байгаа бөгөөд цаг агаарын бэрхшээлтэй байдлаас болж тодорхой хэмжээгээр алдагдалд хүрэх болсон ч ажил амжилттай урагшилж байгааг онцоллоо. Одоогоор 1600 гаруй цэрэг эрс, 1000 гаруй оюутан залуус тариа хураалтын ажилд идэвхитэй оролцож байгаа гэв.
Уулзалтын үеэр ЕТГ-ын дарга Д.Дорлигжав хэлэхдээ “Энэ жил бол атар газар эзэмшсэний 50 жилийн ой тохиож байгаа. Монгол Улсын Ерөнхийлөгчийн зүгээс та бүхний үйл ажиллагааг байнга, цаг ямагт дэмжиж буйгаа илэрхийлэн энэхүү мэндчилгээг нийт тариаланчдад хүргүүлж байна” хэмээн онцлов.
Ерөнхийлөгч мэндчилгээндээ: “Энэ жил ургац арвин ургасан ч тариалангийн бүс нутгуудаар 9 дүгээр сарын 18-20-ны өдрүүдэд болсон байгаль, цаг агаарын аюултай үзэгдлийн улмаас улсын хэмжээгээр 80 орчим мянган га талбайн ургац хүчтэй цасан шуурганд өртөж налсан нь сэтгэл эмзэглүүлж байлаа.
Хэдий тийм боловч тариаланчид маань гар хумхин суулгүй уйгагүй хөдөлмөрлөж, монгол инжнерийн сэтгэлгээ, холч ухаан гаргасны үр дүнд хохирлын хэмжээг эрс багасгаж байгаад Монголын нийт ард түмний өмнөөс болон Төрийн тэргүүний хувьд талархлаа илэрхийлье.
Байгаль, цаг агаарын бэрхшээлийг эрэлхгээр сөрж, цаг нартай уралдан хөдөлмөрлөж байгаа та бүхний ургац хураалтын үйл явцыг Төрийн тэргүүнээс эхлээд Монгол түмэн хотлоороо итгэл найдвар тавин анхааран харж, чих тавин сонсож байгаа” гэдэгээ онцлон тэмдэглэжээ.
