Монгол Улсын Ерөнхийлөгчийн Тамгын газар өнөөдөр хэвлэлийн бага хурал зохион байгуулж, Ерөнхийлөгчийн “Архигүй Монголын төлөө хамтдаа” уриалгыг хэрэгжүүлэхээр ямар ажил хийгээд байгаа талаараа Тамгын газрын дарга Д.Баттулга сэтгүүлчдэд мэдээлэл хийлээ.
Тэрээр хэлэхдээ “Архидан согтуурах явдалтай хийх тэмцлийг эрчимжүүлэх, хүн амын удмын санд учрах сөрөг нөлөөллийг бууруулах үндсэн зорилгоор Монгол Улсын Ерөнхийлөгч Ц.Элбэгдорж 2010 оны 12 дугаар сарын 24-ний өдөр Монголын Үндэсний олимпийн хорооны “Бөртэ чоно-2010” тэргүүн дээд шагнал гардуулах ёслолд оролцохдоо ард түмэндээ хандан архи хэрэглэдэггүй Монгол болохыг уриалж, “Архигүй Монголын төлөө хамтдаа” уриалгыг дэвшүүлснээс хойш нэг жил болж байна. Энэ хугацаанд уриалгыг хэрэгжүүлэх зорилгоор Тамгын газар Ерөнхийлөгчийн ёслолын бүх арга хэмжээний хүлээн авалт, зоогийг архигүй зохион байгуулж, тэдгээрт зориулсан төсвийг 50 хувиар хэмнээд байна. Энэ оны хоёрдугаар сард Тамгын газраас архины хор уршгийн эсрэг үйл ажиллагаа явуулдаг мэргэжлийн болон төрийн бус байгууллагуудын удирдлагуудтай санал солилцож, “Архигүй Монголын төлөө” үндэсний сүлжээг байгууллаа.
Монгол Улсын Ерөнхийлөгчийн Тамгын газрын удирдлагууд Үндэсний татварын ерөнхий газар, ХАҮТ-ийн удирдлагуудтай уулзан оны шилдэг аж ахуйн нэгж байгууллага шалгаруулахдаа архи, согтууруулах ундаа үйлдвэрлэгч, борлуулагч аж ахуй нэгжүүдийг оруулахгүй байхыг уриалж, хууль хяналтын байгууллагуудтай хамтран “Архидан согтуурахтай тэмцэх тухай хууль”-ийн хэрэгжилт, үр нөлөөний талаар судалгааг 5 аймаг, 4 дүүрэг хийв. Мөн Монгол Улсын Ерөнхийлөгч 10 аймаг, 1 дүүрэгт ажиллахад иргэд, олон нийтээс санаачилгыг нь ихэд дэмжин олон тооны санал хэлснийг нэгтгэн дүгнэж, цаашид хэрэгжүүлэх арга хэмжээгээ тодорхойллоо.
Ерөнхийлөгчийн Тамгын газраас зохион байгуулсан ажлын хүрээнд архигүй байгууллага, хамт олон, аймаг болохоо иргэд, төрийн албан хаагчид илэрхийлсээр байна. Архины хэрэглээ буурах хандлага ажиглагдаж байна. Татварын ерөнхий газрын энэ оны эхний 11 сарын дүн мэдээгээр архи, согтууруулах ундааны онцгой татварын орлого сүүлийн жилүүдэд анх удаа 1.3 тэрбум төгрөгөөр буурсан байна. Энэ оны 4 дүгээр сарын 1-ний өдрөөс Гэрлэх ёслолын ордонд архигүй буюу сүүтэй хуримын ёслолын ажиллагаа хийж эхэлсэн нь өнөөдөр орон нутагт ч түгэн дэлгэрч байна.
2011 оны 7 дугаар сараас эхлээд ЭМЯ, ДЭМБ, ЦЕГ, СХЗҮТ, ТЕГ зэрэг төрийн болон ТББ-уудыг оролцуулан Архидан согтуурахтай тэмцэх хуулийн шинэчилсэн найруулгыг хийх ажлын хэсэг байгуулан төслийн эхний хувилбарыг боловсруулж, анхны хэлэлцүүлгийг Ерөнхийлөгчийн дэргэдэх “Иргэний танхим”-д зохион байгуулан эцэслэн дуусгалаа.
Тамгын газар 9 дүгээр сарын 25-наас эхлэн 11 дүгээр сарыг дуусталх хугацаанд 10 аймаг, нэг дүүрэгт “Архигүй монголын төлөө хамтдаа” уриан дор соён гэгээрүүлэх лекц унших, иргэдээс хуулийн төсөлд санал авах аяныг зохион байгуулав. Ирэх жил архичидтай хийх тэмцэлдээ илүү анхаарч соён гэгээрүүлэх арга хэмжээг өргөнөөр зохион байгуулах болно.
Одоо шинэ жилийн баяр болох гэж байна. Иймээс байгууллагууд, ялангуяа төрийн байгууллагууд баярын цэнгүүнээ архигүй хийхэд анхаарахыг уриалж байна. Мөн хэвлэл, мэдээллийнхэн та бүхэн архи, согтууруулах ундааны сурталчилгааг ил далд хэлбэрээр хууль зөрчин гаргадгаа зогсоомоор байна. Байгууллага, салбарууд шилдгүүдээ тодруулахдаа архи, согтууруулах ундаа үйлдвэрлэгч, худалдагчдыг нэр дэвшүүлэхгүй байхыг хүсч байна” гэв.
Дараа нь сэтгүүлчдийн сонирхсон асуултуудад тэрээр хариуллаа.
