Монгол Улсын Ерөнхийлөгчийн санаачилсан “Архигүй Монголын төлөө хамтдаа” уриалгыг хэрэгжүүлэх аяны хүрээнд Ерөнхийлөгчийн Тамгын газар Сонгинохайрхан дүүрэгт соён гэгээрүүлэх лекц уншиж, иргэдийн саналыг сонслоо.
Уулзалт дээр Ерөнхийлөгчийн Тамгын газрын дэд дарга Б.Нэргүй үг хэлэхдээ “Энэхүү аяны хүрээнд Ерөнхийлөгчийн Тамгын газар бүх хэвлэл мэдээллийн байгууллагуудад уриалга хүргүүлээд байгаа. Хэвлэл мэдээллийн хэрэгслээр архийг сурталчлахгүй байхыг бид уриалсан юм. Мөн бүх яамдын сайд нарт, нийслэлийн Засаг дарга, ИХ-ын даргад Ерөнхийлөгчийн Тамгын газраас зөвлөмж хүргүүлээд байгаа. Шинэ жилийн баяр ёслол болж байгаатай холбогдуулан төрийн байгууллагууд татвар төлөгчдийн мөнгөөр архи согтууруулах ундааг худалдан авдгийг таслан зогсоох, төрийн өндөр албан тушаалтан, дүүргийн дарга нар архитай арга хэмжээнд оролцохгүй байх, оны тэргүүнүүдийг шалгаруулахдаа архи үйлдвэрлэдэг, борлуулдаг байгууллагуудыг шалгаруулахгүй байхыг уриалан зөвлөмж гаргасныг дүүргийн удирдлагууд анхааралдаа аван ажиллах хэрэгтэй” гэдгийг онцлон дурьдав.
Дараа нь Архи тамхины шалтгаант эмгэг судлалын төвийн тэргүүн Ж.Цогтсугар “Монгол хүнээ хайрлая” лекц уншлаа.
Тус уулзалт, лекцэд Сонгинохайрхан дүүргийн Тамгын газрын ажилтан албан хаагчид, хороодын Засаг дарга нар оролцов.
Ийнхүү “Архигүй Монголын төлөө хамтдаа” аян Монгол орон даяар өрнөж, нийтдээ 10 аймаг, 9 дүүрэгт соён гэгээрүүлэх лекц уулзалтууд боллоо.
