Өнөөдөр Монгол Улсын Ерөнхийлөгч Ц.Элбэгдорж Монгол Улсаас Кувейт Улсад суух анхны байнгын Элчин сайдаар томилогдсон К.Сайраанд ИЖБ гардууллаа.
Монгол Улс Кувейт Улстай 30 гаруй жилийн өмнө дипломат харилцаа тогтоосон бөгөөд 2009 онд Элчин сайдын яамаа харилцан нээхээр шийдвэрлэсэн нь хоёр улсын хоорондын харилцаа, хамтын ажиллагааг цаашид улам өргөжүүлэн гүнзгийрүүлэхэд чухал алхам болж байгаа юм.
Монгол Улсын Ерөнхийлөгч, Элчин сайд К.Сайраанд хандан, хоёр орны харилцаа сүүлийн 10 гаруй жилд идэвхжих хандлагатай болж худалдаа, эдийн засаг, бизнесийн хамтын ажиллагааг өргөжүүлэн хөгжүүлэхэд түлхүү анхаарч ажиллаж байгааг дурьдаад тус оронтой харилцахад гарч буй нааштай талуудыг бэхжүүлж, хамтын ажиллагааг боломжийн салбар чиглэлүүдээр өргөжүүлэн хөгжүүлэхэд анхаарч ажиллахыг зөвлөв.
Мөн Монгол-Кувейтын засгийн газар хоорондын комиссыг идэвхитэй, үр дүнтэй ажиллуулахад анхаарч, Элчин сайдаар ажиллах хугацаандаа харилцаа, хамтын ажиллагааг худалдаа, эдийн засгийн чиглэлээр өргөжүүлж, хөрөнгө оруулалтыг татах, тухайлбал газрын тос импортлох, уул уурхай, байгаль орчин, эрчим хүч, дэд бүтэц, хөдөө аж ахуй зэрэг салбарт хамтын ажиллагааг хөгжүүлэх, бүс нутгийн орнууд руу мах, арьс, ноос экспортлох, хоёр талын бизнес эрхлэгчдийн хамтын ажиллагааг хөгжүүлэхэд дэмжлэг үзүүлэх зэрэгт түлхүү анхаарч ажиллахыг онцлон тэмдэглэв.
Кувейтын Засгийн газрын буцалтгүй тусламжаар Улаанбаатарт үндэсний шинэ номын сан барих асуудлыг урагшлуулж, ойрын үед хэрэгжүүлэх чиглэлээр ажиллах нь шинээр томилогдсон Элчин сайдын анхаарч ажиллах асуудлын нэг болохыг Ерөнхийлөгч анхааруулсан юм.
Элчин сайд К.Сайраан өндөр итгэл үзүүлж хариуцлагатай албанд тохоон томилж байгаад талархал илэрхийлээд түүний хамааран суух болон хавсран суух орнуудад хөгжлийн болон хөрөнгө оруулалтын тус тус 5 сан буйг онцлоод тухайн салбарууд хийгээд Ерөнхийлөгчийн чиглэл болгосон салбарт идэвхитэй, хариуцлагатай ажиллахаа тэмдэглэн хэлэв.
