Монгол Улс цаазаар авах ялыг бүрмөсөн халж буйг Франц, Европын Холбоо, Эмнести интернэшнл дэмжиж мэдэгдэл гаргалаа
Оны өмнөхөн Улсын Их Хурал олон улсын цаазаар авах ялыг халахад чиглэсэн Нэмэлт II протоколд нэгдэн орох шийдвэр гаргасны дараа Францын Гадаад яам, Европын гадаад хэргийн яамнаас дараах мэдэгдлийг гаргасан байна.
Мэдэгдэлд “Монгол Улсын Их Хурал Иргэний болон улс төрийн эрхийн тухай олон улсын Пактын цаазаар авах ялыг халахад чиглэсэн Нэмэлт II протоколд нэгдэн орох шийдвэр гаргаж, цаазаар авах ялыг бүрмөсөн халж буйг Франц Улс талархан сайшааж байна.
Түүнчлэн 2010 оны нэгдүгээр сард дээрх зорилгоор цаазаар авах ялыг түдгэлзүүлэх мэдэгдэл гаргасан Монгол Улсын Ерөнхийлөгч Цахиагийн Элбэгдоржийн санаачилгад сэтгэл өндөр буйгаа илэрхийлж байна.
Франц Улс нь тив дэлхийн хаана ч, бүхий л нөхцөл байдалд цаазаар авах ялыг халахын төлөөх өөрийн улсын болон Европын оруулах хувь нэмэр, үйл хэргээ тууштай үргэлжлүүлэхээ дахин нотолж байна” гэжээ.
Иргэний болон улс төрийн эрхийн тухай олон улсын пакт (ИУТЭОУП)-ын Нэмэлт II Протоколд нэгдэн орох хуулийн төслийг Монгол Улсын Их Хурлын гишүүдийн дийлэнх олонхийн саналаар баталжээ.
Эмнести Интернэшнлийн Ази, Номхон далайн бүсийг хариуцсан захирал Сэм Зариф “Монгол Улсын парламентаас гаргасан энэ шийдвэр нь бас нэгэн чухал алхам бөгөөд цаашид яаралтай хууль тогтоомждоо хэрэгжүүлэх нь зүйтэй. Монгол Улс нь цаазаар авах ялаас татгалзснаар Ази,Номхон далайн бүс нутагтаа бусад улс орнуудад дагаж мөрдөх хэм хэмжээг бий болгож байгаа юм” хэмээн өгүүлж байна.
Эмнести Интернэшнл байгууллагаас Монгол Улсад цаазаар авах ялыг халах асуудлаар өргөн хүрээнд кампанит ажлыг явуулж ирсэн.
2010 оны нэгдүгээр сарын 14-нд Монгол Улсын Ерөнхийлөгч Ц.Элбэгдорж цаазаар авах ялын гүйцэтгэлд мораториум тогтоож байгаагаа мэдэгдсэнээр энэ ялыг халах анхны чухал алхмыг авч хэрэгжүүлсэн нь олон улсын талархлыг хүлээсэн үйл явдал болсон.
Өнөөдөр дэлхийн улс орнуудын 2/3-оос илүү хувь нь цаазаар авах ялыг хуульдаа болон практикт халаад байна. Ази, Номхон далайн бүс нутгийн 41 орноос 17 нь цаазаар авах ялыг бүх хэргүүдэд, 9 нь практикт халсан ба зөвхөн Фижи улс цаазаар авах ялыг онцгой цэргийн гэмт хэрэгт хэрэглэдэг. Үлдсэн 14 улс орон энэ ялыг хэрэгжүүлж байгаа ба Хятад улс нь жилд цаазалж байгаа хүмүүсийнхээ тоогоор дэлхийд тэргүүлсээр байна.
Эмнести Интернэшнл цаазаар авах ял нь туйлын хэрцгий, хүнлэг бус, нэр төрийг доромжилсон ял шийтгэл ба Хүний эрхийн түгээмэл тунхаглалд заасан амьд явах эрхийг зөрчиж байна хэмээн үздэг юм” гэжээ.
Монгол Улс цаазаар авах ялыг бүрмөсөн халж буйг Франц, Европын Холбоо, Эмнести интернэшнл дэмжиж мэдэгдэл гаргалаа
