Ерөнхийлөгчид МОНЦАМЭ агентлаг ажлаа танилцуулж, хуультай болгож өгөхөд анхаарахыг хүслээ
МОНЦАМЭ агентлагт зочилсон Монгол Улсын Ерөнхийлөгч Ц.Элбэгдоржид тус агентлагийн Ерөнхий захирал Т.Баасансүрэн өнөөдөр ажлаа танилцуулав. Тэрээр хэлэхдээ “Манай агентлаг өнгөрсөн жил 90 жилийнхээ ойг тэмдэглэсэн. Энэ ойд Монгол Улсын Ерөнхийлөгч чин сэтгэлийн сайхан үгтэй илгээлт ирүүлсэн. Түүнд их баярлаж байгаа. Учир нь МОНЦАМЭ агентлагийн хууль гарга гэсэн үүрэг өгсөнд бид ихэд хүндэтгэн хүлээн авсан.
1998 оны Хэвлэл мэдээллийн эрх чөлөөний тухай хуулийг хэрэгжүүлэх ажлын хүрээнд УИХ-ын 103 дугаар тогтоол гарсан. Тогтоолд “Мэдээлэл, радио, телевизийн хэрэг эрхлэх газар, МОНЦАМЭ агентлагийг татан буулгасугай, хууль гаргах замаар Үндэсний олон нийтийн мэдээллийн хэрэгсэл болгосугай” гэж заасан байдаг. 2005 онд Олон нийтийн радио, телевизийн тухай хууль гарсан. Гэтэл тогтоол гараад 13 жил болоход МОНЦАМЭ агентлаг хуульгүй хэвээр байна. Засгийн газар, Хууль зүй, дотоод хэргийн яаманд хуультай болгож өгөх шаардлага тавьж байж, өнгөрсөн жил төслийг нь боловсруулан өргөн баригдсан. Харамсалтай нь Засгийн газар дээр хав дарагдлаа. Өөрийн гэсэн агентлагаас салах бодолгүй байгаа юм уу гэж бодож байна.
Төрийнхөө тэргүүнийг агентлагдаа зочилж ирснийг ашиглан илгээлтдээ дурьдсан манай хуулийн асуудлыг анхааралдаа аваасай гэж хүсч байна. Уг нь төсвөөс санхүүжилт авдаг, Засгийн газарт захирагддаггүй Үндэсний мэдээллийн агентлаг болох ёстой. Москва, Бээжинд нэг нэг сурвалжлагчтай. Тэндхийн амьжиргааны нөхцөлийг бодолцон цалин өгч чаддаггүй. Тав, зургаан зуун мянган төгрөгийн цалин өгдөг. Хуультай болчихвол цалингийн болон АНУ-д сурвалжлагч суулгах асуудлыг шийдэх боломж нээгдэнэ гэж бодож байгаа. Би гурван зорилго тавьж ажилласан. МОНЦАМЭ-г олон улсын агентлагуудын удирдах зөвлөлд оруул гэсэн оруулсан. Олон улсын хурлыг нь Монголд хий гэсэн хийлгэлээ. 90 жилийн ойг нь сайхан хийе гэж бодсон хийчихлээ. Хөдөмөрлөсөн 37 жилийнхээ 14-т нь энэ агентлагт ажиллалаа. Одоо хуультай болгочих юмсан гэж бодох юм гэлээ.
Ерөнхийлөгч бусад улсад ямархуу жишигтэй байдгийг сонирхов. Тэрбээр “Хоёр л жишиг бий. Нэгд хэвлэл мэдээллийн байгууллагууд хамтраад дундаасаа корпорац байгуулдаг, харин жижиг орнууд төсвөөс санхүүждэг, тусдаа хуультай, Засгийн газраас хараат бус агентлагтай байдаг” гэв.
Мөн саяхан Үндэсний эрх чөлөө, тусгаар тогтнолоо сэргээсний 100 жилийн ойд зориулсан УИХ-ын хүндэтгэлийн чуулган дээр Ерөнхийлөгчийн хэлсэн үгийг үнэхээр зүрх сэтгэл догдлон хүлээн авснаа тэрбээр хэллээ. Ялангуяа дэлхийд тарсан Монголчууддаа хандсан тэр үг их сайхан санагдлаа. Намайг 1973 онд сурч байхад Изриалийн Ерөнхий сайд дэлхийгээр тарсан еврейчүүдэд хандан ингэж уриалж байсан юм. Тэр үед хамт сурч байсан еврейчүүд сургуулиа хаяад явцгаасан. Тэгэхэд Изриаль 1,9 сая хүнтэй байсан. Одоо 5 сая гаруй хүнтэй, сайхан хөгжсөн орон боллоо шүү дээ гэж тэр ярилаа.
Ерөнхийлөгч “Хэвлэл бүр нэг сэдэв анхааран аваад явбал сайн байна. Жишээ нь “Өнөөдөр” сонин Балдорж эрхлэгчийн байгаль орчны асуудлаар бичиж байсныг үргэлжлүүлээд явбал сайн байна. Таны саяын хэлсэн монголчуудын асуудлыг танай сонин аваад явах гэх мэтээр. Монголчуудыг гадаадад явуулах агентлаг бид ажиллуулж байлаа шүү дээ. Тэгвэл түүнийг монголчуудаа авчирдаг, монголоо сурталчилдаг агентлаг болгон хувиргая гэж бодож байгаа. Мэдээж алхам алхмаар хийнэ. Эхлээд монголдоо яаж олуулаа болох вэ гэдгийг буюу иргэдийнхээ амьдрах нөхцөлийн асуудлыг шийдье. Тэгээд өөрийн иргэдээ эргүүлж авчиръя.
Дээр нь монголдоо ирье гэсэн хүмүүсийн асуудлыг ярья гэж бодож байгаа. Бусдын туршлагыг харлаа. Энэ бол урт удаан хугацааны ажил. Манайхан нэг зүйлийг сэтгэлгээнээсээ авч хаях хэрэгтэй байна. Нэг өвөр монгол хүрээд ирвэл хужаагийн эрлийз гээд л гоочилдог. Ийм байж болохгүй. Сингапур 500 мянган хүнтэй байсан. Одоо зургаан сая болчихлоо. Түүхийг үзэж байхад богдыг хаанаар өргөмжлөхөд хорь гаруй газраас дагаар оръё гэж бичиг ирүүлж байжээ. Тэгээд бодохоор монголд элэгтэй хүмүүсийн асуудлыг бодолцох хэрэгтэй л юм шиг санагдсан” гэж хэлэв.
МОНЦАМЭ агентлагийн захирал Т.Баасансүрэн Ерөнхийлөгчид өөрийн бичсэн номуудыг нутгийн зургийн хамт дурсгалаа.
Ерөнхийлөгчид МОНЦАМЭ агентлаг ажлаа танилцуулж, хуультай болгож өгөхөд анхаарахыг хүслээ
