Монгол Улсын Ерөнхийлөгчийн илгээлт Байгаль орчны ажилтны улсын зөвлөгөөнд оролцогчдод
Байгаль орчны ажилтны улсын зөвлөгөөнд оролцогчдод
Уур амьсгалын өөрчлөлт нь экосистем, эдийн засаг, нийгэмд тулгараад байгаа хамгийн бэрхшээлтэй асуудлын нэг болсон энэ цаг үед Монгол орны байгаль орчны тулгамдсан асуудлыг хэлэлцэж, цаашдын үйл ажиллагаа, хэрэгжүүлэх арга хэлбэрээ тодорхойлохоор хуран чуулж байгаа Эрхэм хүндэт хатагтай, ноёд Та бүхний энэ өдрийн амар амгаланг эрж мэндчилье.
Рио-де-Жанейро, Йоханнесбургээс дэвшүүлсэн даян дэлхийн тогтвортой хөгжлийн үзэл санаа, тунхаглалыг хэрэгжүүлэхэд хүн төрөлхтөн 21-р зуунд байгаль орчиндоо нэн зохицсон амьдралын хэв маягийг бүрдүүлж, тогтвортойгоор хөгжин дэвших нийтлэг зорилтыг дэвшүүлэн идэвхтэй ажиллаж байна.
Монгол Улс энэхүү нийтлэг зорилтыг хэрэгжүүлэхээр өөрийн орны онцлогт тохирсон хөгжлийн чиг хандлагыг тодорхойлсон “Үндэсний аюулгүй байдлын үзэл баримтлал”, “XXI зууны тогтвортой хөгжлийн хөтөлбөр”, “Мянганы хөгжлийн цогц бодлого”-оо дээрх тунхаглал, үзэл баримтлалын хүрээнд шинэчлэн боловсруулж, хэрэгжүүлж эхлээд байгаа билээ.
Иргэд, иргэний нийгмийн байгууллага, төр засгаас байгаль орчны асуудалд хандах хандлага, ухамсартай үйл ажиллагаа, идэвхтэй оролцоо, хамтын ажиллагаа эрс идэвхжин шинэчлэгдэж байгаад Төрийн тэргүүн Би сэтгэл хангалуун байна.
“Тогтвортой хөгжил-Байгаль орчны засаглал” үндэсний чуулган, байгаль орчны ажилтны улсын зөвлөгөөн оролцож байгаа Та бүхний анхаарлыг дараах зүйлүүдэд хандуулан, цаашдын ажилдаа тусган хэрэгжүүлнэ гэдэгт итгэж байна.
· Үндэсний аюулгүй байдал, тогтвортой хөгжлийн зарчимд тулгуурласан, газрын зөв бодлого, менежментэд түшиглэсэн, байгаль орчны хууль тогтоомжийн хэрэгжилтэд тавих хяналт, санхүүжилтийн системийг төгөлдөржүүлсэн хууль эрх зүй, стандартын шинэчлэлийг хийж хэрэгжүүлэх нь нэн тэргүүний зорилт байх ёстой.
· “Ногоон хөгжил”, “Ногоон эдийн засаг”–ийн тогтолцоог бүрдүүлж, экологийн болон дотоодын аялал жуулчлалыг хөгжүүлэх, үүнтэй уялдуулан хүүхэд залуучуудын экологийн боловсролыг дээшлүүлэх, эх орон, унаган байгалиараа бахархах бахархалыг өрнүүлэх талаар анхаарч ажиллах нь чухал байна. Мөн хариуцлагатай уул уурхайн зарчмыг нэвтрүүлж, экологид ээлтэй тэргүүний арга, технологи, шинжлэх ухааны ололтыг судлан нутагшуулах, дотоодын судалгаа шинжилгээ, технологи боловсруулах чадавхийг дээшлүүлэх явдал юм.
· Засгийн газраас уур амьсгалын өөрчлөлтийн асуудлыг үндэсний хэмжээнд эдийн засаг, нийгмийн салбаруудын хөгжлийн хэтийн төлөв, техник технологийн шинэчлэлийн гол зангилгаа асуудал гэж үзэж бодлого, зохион байгуулалтаар хангаж ажиллах хэрэгтэй.
· Нарийн мэргэшсэн сайн боловсон хүчин, нутгийн иргэдийн хяналт, урамшуулал, тогтвортой санхүүлжилт, улс төрийн зөв манлайлал нийлж байж улс төр, нийгмийн бүхий л хүрээнд “Байгаль орчны сайн засаглал” бий болно.
· Хот суурингийн ус, хөрс, агаарын бохирдлыг бууруулах, хог хаягдлыг багасгахад төр, засгийн оновчтой шийдвэр, шуурхай зохицуулалт, иргэдийн ухамсартай, ухаалаг зөв хэрэглээ шийдвэрлэх үүрэгтэйг дурьдах нь зүйтэй.
· Тусгай хамгаалалттай газар нутагт хяналт шалгалт, эрдэм шинжилгээ, судалгааны ажил хийх, зэрлэг ан амьтны амьдрах орчинг сайжруулах, нутаг бэлчээрийг доройтлоос хамгаалах тогтвортой санхүүжилтийн механизм дутагдаж байгааг анхааралдаа авч, хамгаалалтын менежментийг олон улсын түвшинд хүргэж сайжруулах шаардлагатай юм.
Байгаль орчны тулгамдсан асуудлуудыг шийдвэрлэх арга замыг тодорхойлон хэрэгжүүлэхэд иргэний нийгмийн байгууллагууд, ард иргэд, аж ахуйн нэгжүүдийн санал санаачилгыг өрнүүлж, улмаар бүх шатны төрийн болон төрийн бус байгууллагын зүй зохистой, үр ашигтай хамтын ажиллагааг бий болгоход энэ зөвлөгөөн ихээхэн ач тусаа өгнө гэдэгт Монгол Улсын Ерөнхийлөгч Би бүрэн итгэлтэй байна.
Монгол орон үүрд мандан бадраг.
МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ
2012 оны 01 дүгээр сарын 14-ний өдөр
Улаанбаатар хот
Монгол Улсын Ерөнхийлөгчийн илгээлт Байгаль орчны ажилтны улсын зөвлөгөөнд оролцогчдод
