Монгол Улсын Ерөнхийлөгч Ц.Элбэгдорж өнөөдөр, манай улсад айлчилж байгаа ОХУ-ын БНБуриад улсын Ерөнхийлөгч В.В.Наговицын-ийг хүлээн авч уулзлаа.
Ерөнхийлөгч Ц.Элбэгдорж, Ерөнхийлөгч В.В.Наговицынд хандан манай улсад хийж байгаа айлчлалд нь амжилт хүсээд, Монгол Буриадын сайн хөршийн найрсаг харилцаа, хамтын ажиллагааг хөгжүүлэхэд энэ айлчлал чухал ач холбогдолтой болно гэдэгт итгэж байгаагаа хэллээ. 2009 он манай хоёр орны хувьд чухал он байсан бөгөөд, ОХУ-ын Ерөнхийлөгч, ЗГ-ын дарга, Холбооны Хурлын дарга нарын айлчлал амжилттай болж, эдгээр айлчлалуудын үеэр яригдсан харилцааны чухал асуудлууд ажил хэрэг болж эхэлж байгаа нь сайн хэрэг гэдгийг онцоллоо.
Монгол Буриадын худалдаа эдийн засаг, хүмүүнлэгийн хамтын ажиллагааны хувьд 2010-2012 онуудад хийх тодорхой арга хэмжээний төлөвлөгөөнд гарын үсэг зурах гэж байгаа бөгөөд, энэ хүрээнд үр тарианы аж ахуй байгуулах, мах махан бүтээгдэхүүн болон малыг хөлөөр нь гаргах, монголын махыг эрүүлжүүлэх, МИ-8 нисдэг тэрэгний засвар үйлчилгээ, галт тэрэгний зүтгүүрийн засвар үйлчилгээнүүдийг хамтран хийх, монголын боловсон хүчнийг энэ чиглэлээр бэлтгэх зэрэг тодорхой асуудлууд туссан байгаа тухай ОХУ-ын БНБуриад улсын Ерөнхийлөгч В.В.Наговицын ярилаа.
Хоёр талын хамтын ажиллагааг идэвхжүүлэхэд, үйлдвэр, хувийн хэвшлийн байгууллагуудын шууд харилцаанд дэмжлэг үзүүлэх, аялал жуулчлалыг хоёр талдаа дэмжих, харилцан мэдээлэл солилцох ажлыг тогтмолжуулах, үзэсгэлэн, яармаг, соёлын арга хэмжээг өргөн хүрээнд хийх нь чухал гэдэгтэй хоёр Ерөнхийлөгч санал нэг байлаа.
