Уул уурхайн тээврийн асуудлаар ярилцав
Таван толгойн нүүрсний ордыг түшиглэсэн уул уурхайн компаниудын үйл ажиллагаа эрчимжиж, олборлолт явуулахын хэрээр дэд бүтцийн асуудлуудыг хурдан шийдвэрлэж, ялангуяа авто зам, төмөр замыг яаралтай барьж ашиглалтад оруулах шаардлагатай байна гэж Монгол Улсын Ерөнхийлөгч Ц.Элбэгдорж хэллээ.
Ерөнхийлөгч Өмнөговь аймгийн Цогтцэций, Ханбогд сумдад уул уурхай эрхэлж байгаа компаниудын үйл ажиллагаатай танилцах үеэр хамгийн их хөндөгдөж байсан сэдвүүдийн нэг бол тээвэрлэлттэй холбоотой асуудлууд байлаа.
Өнгөрсөн жил ”Энержи Ресурс” ХХК уурхайгаасаа Гашуун Сухайтын хилийн боомт хүртэлх 245 км хатуу хучилттай зам тавьсан нь тус бүс нутгийн нүүрс тээвэрлэлтийг хөнгөвчлөхөд ихээхэн хувь нэмрээ оруулсан юм. Гэвч энэ зам дангаараа ачааллыг даахгүйн дээр эдийн засгийн хувьд ч , байгал орчны хувьд ч яаралтай хатуу хучилттай авто зам , төмөр замаа барих шаардлагатай байгаа юм.
Ерөнхийлөгчийг дагалдан орон нутагт ажиллаж байгаа зам тээврийн мэргэжлийн хүмүүсийн тайлбарласнаар , нүүрс олборлодог компаниуд зам нэмж барих хүсэлтээ гаргаж байгаа. Тухайлбал “Эрдэнэс Таван толгой“ төсөл Гашуун Сухайт хүртэл хатуу хучилттай авто зам барих зураг төсөл, эдийн засгийн үндэслэлээ бэлэн болгосон. Энэ онд ажилдаа орно. Засгийн газрын түвшинд, эхний ээлжинд “Энержи Ресурс” ХХК-ийн тавьсан замтай зэрэгцүүлээд өөр нэг зам тавьж, эсрэг урсгал болгоод нэг замаар нь ирдэг, нөгөө замаар нь буцдаг байх хувилбар зөв юм байна гэж ярилцаж байгаа гэлээ.
Харин төмөр замын тухайд , ажил удааширч байгаа. ЗТБХБ-ын төрийн нарийн бичгийн дарга н.Бат-Эрдэнэ хэлэхдээ, төслийн нэг хоёрдугаар шатны ажлаа зэрэг эхлүүлэхээр болсон. Хоёр тийшээ чиглэлтэй замаа зэрэг эхлүүлнэ гэсэн үг. Засгийн газар эхний ээлжинд 55 сая долларын хөрөнгө оруулалт шийдвэрлэсэн. Гэхдээ энэ бол зөвхөн дизайн, зураг төслөө эхлүүлэх мөнгө. Төмөр замын нэг хоёрдугаар шатны төслөө зэрэг эхлүүлээд, зураг дизайныг нь зэрэг хийгээд явахад 250 сая доллар хэрэгтэй гэж тооцоолж байна. “Монголын Төмөр зам” компанийн 49 хувийг хувьчлаад, компаниа томруулах хэрэгтэй. Гадаадын хөрөнгө оруулагчдад мөн найдаж байгаа гэв.
Ерөнхийлөгч Ц.Элбэгдорж, төмөр зам барих ажил “заан тугаллах шиг удаан” байна гэж шүүмжиллээ. “2009 онд асууж байхад 2 жилийн дараа ажил эхэлчихсэн байна гэж байсан. Гэтэл өнөөдөр нэг ч төмөр тавиагүй байна. Хөрөнгө мөнгө босгох гэх зэрэг шалтгаанаар цаг хугацаа алдаж, эдийн засгийн хувьд ч, байгал орчны хувьд ч хохиролтой байсаар байна” гэв.
Авто зам, төмөр зам аль алийг нь хийхдээ зэрлэг амьтны нүүдэл, мал оторлуулах зэргээ тооцоолж гарцуудыг хийж өгөх шаардлагатай болохыг мөн энэ үеэр ярилцлаа.
Уул уурхайн тээврийн асуудлаар ярилцав
