Өнөөдөр ОХУ-аас Монгол Улсад суух Онц бөгөөд бүрэн эрхт Элчин сайд Виктор Васильевич Самойленко Монгол Улсын Ерөнхийлөгч Цахиагийн Элбэгдоржид Итгэмжлэх жуух бичгээ өргөн барилаа.
В.В.Самойленко нь 1970 онд ЗХУ-ын ГХЯ-ны дэргэдэх Москвагийн олон улсын их сургуулийг дүүргэсэн. ОХУ-ын Байгалийн Ухааны Академийн Академич, түүхийн ухааны дэд эрдэмтэн. Англи, малай, герман, индонез хэлтэй, мэргэжлийн дипломатч.
Итгэмжлэх жуух бичиг өргөн барьсны дараа Ерөнхийлөгч Ц.Элбэгдорж, шинээр томилогдсон Элчин сайд В.В.Самойленко нар хоёр орны харилцаа, хамтын ажиллагааны тухай санал солилцов.
Эхлээд Монгол Улсын Ерөнхийлөгч Ц.Элбэгдорж ОХУ-ын Элчин сайдад хандан ИЖБ-ээ өргөн барьж, шинэ ажилд томилогдож буйд нь баяр хүргэсэн юм. Ерөнхийлөгч хэлэхдээ, манай хоёр орны харилцаа эрэлхэг хөвгүүдийн маань цусаар гагнагдаж, ард түмний маань хөлс хөдөлмөрөөр бэхэжсэн өвөрмөц нандин онцлогтой гээд Монгол Улсын Ерөнхийлөгчөөр сонгогдсоны дараа анхны эрхэм хүндтэй зочин болж ОХУ-ын Ерөнхийлөгч Д.А.Медведев Монгол Улсад төрийн айлчлал хийсэнд нь талархаж байгаагаа илэрхийлэв.
Мөн хоёр орны хооронд уул уурхай, батлан хамгаалах зэрэг олон салбарт хамтын ажиллагаагаа хөгжүүлэх шинэ үе эхэлж байгаад сэтгэл өндөр буйгаа онцолсон юм.
Элчин сайд В.В.Самойленко, Монгол Улсад суух Элчин сайдаар томилогдсондоо баяртай байгаагаа илэрхийлээд хоёр орны олон жилийн уламжлалт найрсаг харилцааг улам өндөр түвшинд хүргэхэд хичээн ажиллахаа онцлон хэлэв.
