“Энержи Ресурс”-ын бүтээн байгуулалт өрнөж байна
Монголын хөгжил дэвшил, үйлдвэржилтэд бодитой хувь нэмрээ оруулж байгаа “Энержи Ресурс” ХХК-ийн Ухаа худаг уурхайн үйл ажиллагаатай Монгол Улсын Ерөнхийлөгч Ц.Элбэгдорж танилцлаа. Тус уурхай, 2009 оноос үйл ажиллагаагаа эхлүүлж, нүүрс баяжуулах үйлдвэр барьж ашиглалтад оруулсан, 2010 онд Хонконгийн хөрөнгийн биржээр дамжуулан хувьцаа гаргаж олон улсын зах зээлд гаргасан, 18 мегаваттын цахилгаан станц барьсан, зөвхөн олборлолт төдийгүй уурхай дагах бусад бүтээн байгуулалтуудыг богино хугацаанд амжилттай хийж гүйцэтгэсэн гээд ярьж танилцуулах, үзүүлж харуулах зүйл ихтэй байлаа. Уурхайн оффисын барилга, баяжуулах үйлдвэр, орон сууцны “Цэций” хороолол болон ажилчдын Галлерей хотхонуудаа үзүүлэв.
Нүүрс баяжуулах үйлдвэр жилд 5 сая тонн нүүрс боловсруулах хүчин чадалтай. Австралийн Сежмен компанийн дизайн ба технологийн шийдэлд суурилсан, ашигласан усаа 94 хувь эргүүлэн ашиглах технологийг нэвтрүүлсэн байна. Үйлдвэрийг барихад дотоодын 50 орчим компанийн 550 гаруй ажилтан хамтран болон туслан гүйцэтгэгчээр ажиллажээ.
18 мегаваттын шинэ цахилгаан станц барьснаар зөвхөн уурхайн хэрэгцээг хангаад зогсохгүй Цогтцэций сум тог цахилгаантай болсон. Энэ нь монгол инженерүүдийн хүч, ур ухаанаар боссон анхны цахилгаан станц бөгөөд усыг 98 хувь эргүүлэн ашиглах, мөн агаарын хөргөлтийн системтэй, монголд одоо ашиглагдаж буй цахилгаан станцуудтай харьцуулахад усны хэрэглээ 4-5 дахин бага юм байна. Дотоодын 80 гаруй компанийн 1500 ажилтан ажиллажээ.
Өнгөрсөн жил хийсэн бусад томоохон бүтээн байгуулалт нь ус хангамжийн систем , Ухаа худаг- Гашуун сухайтын чиглэлийн хатуу хучилттай авто зам юм. 100 хүртэл тоннын даацтай автомашин зорчиход зориулсан 245 км урт, жилд 18 сая тонн хүртэл ачаа тээвэрлэх хүчин чадалтай зам нь монголын авто замын түүхэн богино хугацаанд өндөр чанартай барьсан замд тооцогдоно гэж компанийн удирдлага танилцууллаа.
Орон сууцны Цэций хорооллын эхний хэсэг болох 96 айлын сууц өнгөрсөн жил ашиглалтад орж одоо нэмж 168 ба 312 айлын орон сууцнуудыг барьж байна. Өнгөрсөн жил ашиглалтад орсон “Мөрөөдөл” сургууль цэцэрлэг ажиллаж байгаа.
Мөн ажилчдын Галлерэй хотхон нь 289 өрөөтэй, халуун ус, халаалт, хөргөлтийн систем, утасгүй интернет, эмнэлэг, спортын төв, номын сан, дэлгүүр, гоо сайхан гээд хүний тухтай ажиллаж амьдрах бүхий л нөхцлийг хангасан архитектурын өвөрмөц шийдэлтэй хотхон юм.
Энэ мэтчилэн өнгөрсөн хугацаанд “Энержи Ресурс” компани уурхайн дагалдах болон бусад дэд бүтцийн төслүүдэд 600 орчим тэрбум төгрөгийн хөрөнгө оруулалт хийжээ. 2009 онд улсын төсөвт 13 тэрбум төгрөг төлж байсан бол өнгөрсөн жил 120 тэрбум төгрөгийн татвар төлсөн байна.
“Энержи Ресурс”-ын бүтээн байгуулалт өрнөж байна
