Монгол Улсын Ерөнхийлөгчийн дэргэдэх “Иргэний танхим”, нийслэлийн Ардчилсан хүчний холбоо хамтран Иргэний нийгмийн өдрийг тохиолдуулан нээлттэй хэлэлцүүлэг өнөөдөр зохион байгууллаа. Хэлэлцүүлгийг “Монгол дахь иргэний нийгмийн хөгжил, өнөөгийн байдал, ирээдүйн чиг хандлага” сэдвээр хийж, нийслэлийн Ардчилсан хүчний холбооны ерөнхий зохицуулагч Ж.Батзандан “Монгол Улс дахь иргэний нийгмийн хөгжил, өнөөгийн байдал, цаашдын чиг хандлага”, Иргэний нийгмийн зохицуулагч, Ардчиллын боловсрол төвийн захирал Г.Ундрал “Төр, иргэний нийгмийн түншлэл, ололт амжилт, сургамж”, Төр ба иргэний нийгмийн бодлого боловсруулах ажлын хэсгийн дэд дарга Д.Сүхжаргалмаа “Иргэний нийгмийн үзэл баримтлалын төсөл” гэсэн илтгэл тус тус тавьж, оролцогчид саналаа илэрхийлэв.
Иргэний нийгмийн байгууллагууд 1992 оноос үүсч төлөвших, 2004 оноос далайцтай ажиллах, 2008 оноос төрөлжсөн зохион байгуулалтад орох үе шатуудыг туулж, хөгжлийн хувьд том алхам хийгээд байна. Иргэний нийгмийн байгууллагад төрийн бус байгууллагууд, иргэний хөдөлгөөнүүд, эрх ашгаа хамгаалахаар эвсэлдэн нэгдсэн иргэдийн үүсгэл санаачилгын байгууллагууд ордог. Үүн дээр иргэдийн төлөөллийн байгууллага буюу нутгийн өөрөө удирдах ёсны байгууллагыг оруулах хэрэгтэй байна. Засгийн газар, иргэний нийгмийн зөвлөл хоёр нэг хэмжээнд байж, иргэний нийгмийн байгууллагуудыг хөгжүүлэх, тэдгээрийн болон иргэдийн эрх ашгийг хамгаалах асуудлаар зөвшилцдөг байх ёстой. Засгийн газраас ажлын хэсэг гарган Иргэний нийгмийн үзэл баримтлал боловсруулаад байгаа нь сайшаалтай хэрэг. Гэхдээ дөрвөн жилийн өмнө 1500 байсан ТББ 12000 болсныг сая дууллаа. Тэд санхүүжилтийн тайлангаа өгдөггүй, цаасан дээр ихэвчлэн ажилладгийг халж, хариуцлага хүлээдэг болмоор байна. Юу хийж байгаагаа вэб сайтад тавьдаг, нэгдсэн уулзалтуудаар ажлынхаа тайланг танилцуулдаг байя. Иргэний хөдөлгөөнийхөн, төрийн бус байгууллагынхан уулзаж чухал чухал асуудлаа хоорондоо яриад байлгүй иргэдийг оролцуулж, тэр сайхан санал санаачилгаа дуулгаж үгийг нь сонсдог болъё. Үндэсний чуулган хийнэ гэж ярилаа. Тэрүүндээ зөвхөн өөрсдөө бус иргэдийг оруулаарай. Газрын тухай багц хуулийн төслийг УИХ хэлэлцэж эхэлж байгаатай холбогдуулан газрын асуудлаар нээлттэй хэлэлцүүлэг ойрын хугацаанд “Иргэний танхим”-д зохион байгуулж, энэ чиглэлээр ажилладаг ТББ-ууд, иргэдийн хөдөлгөөнийхний үгийг сонсох нь чухал байна. Иргэний нийгмийн байгууллагуудын санхүүжилтэд хандив өргөсөн томоохон компаниудыг татвараас тэр хэмжээгээр нь чөлөөлүүлэх тухай зарим хүн ярьж байна. Энэ бол зохистой хувилбар биш. Харин цалин, уул уурхайн компаниудаас авах татварын нэг хувийг ашиглан сан үүсгэж, иргэний нийгмийн байгууллагуудын санхүүжилтэд ашиглах нь зөв хэмээн оролцогчид ярилаа.
