Та бүхэн өчигдрийг хүртэл хөрөнгө оруулагчид байсан бол, өнөөдөр бидний хамтрагчид боллоо” хэмээн Монгол Улсын Ерөнхийлөгч Ц.Элбэгдорж өнөөдөр Рио Тинто компанийн Ерөнхий захирал Том Албаниз тэргүүтэй төлөөлөгчдийг хүлээн авч уулзах үеэрээ хэлэв.
Тэрээр, Монгол улсын ирээдүйн хөгжилд чухал алхам болно хэмээн ард түмний хүлээж байгаа гэрээнд гарын үсэг зурсанд Рио Тинто болон Айвенхоу Майнз компанийн удирдлагад баяр хүргэлээ.
“Бид Монгол Улсын эдийн засаг, нийгмийн шинэ эрийн үеийг авчрах , хөгжлийн төлөө хамтран зүтгэх үүрэг хүлээж байна. Бид ард түмний сайн сайхан амьдрах хүсэл мөрөөдлийг биелүүлэх шинэ түүхийг хамтран эхлүүлэх гэж байна.
Монгол улс, Та бүхнийг дэлхий дахинд үлгэр жишээ болохуйц уул уурхайг байгуулна хэмээн итгэж харж байгаа. Оюутолгой төсөл бол хамгийн хариуцлагатай, нээлттэй, аюулгүй бүтээн байгуулалт болох учиртай. Мөн, манай ард түмний эрх ашгийг хүндэтгэж ажиллана гэдэгт бид итгэж байна.
Оюу толгойн орд ашиглах гэрээнд гарын үсэг зурсанаар түүхэн том бүтээн байгуулалт эхэлж байна. Энэ төсөл манай ард үр ашгаа түмэнд жигд хүртээмжтэй хүртээх ёстой гэдэг байр суурьтай байгаагаа дахин илэрхийлье. Манай улсын иргэн бүр сэтгэл ханамжтай байх нь чухал. Тэд боловсрол, эрүүл мэнд, амьдрах орчиндоо санаа зовохгүй тайван амар байж, хамгийн чухал нь ирээдүй үр хойчдоо хөрөнгө оруулалт хийж чадаж байгаадаа итгэлтэй байх нь чухал юм. Бид ч мөн тийм байлгахын тулд анхаарах болно. Түүнээс гадна, уул уурхайн салбарт мэргэжлийн боловсон хүчин бэлтгэхэд Та бүхэн анхаарч байгаад талархаж байна. Дэлхийн түвшинд үнэлэгдэх өндөр боловсролтой уул уурхайн мэргэжилтэн , нөөц бэлдэх нь та бидний хамтран хэрэгжүүлэх энэ төслийн бас нэгэн чухал зорилт байх болно” хэмээн Ерөнхийлөгч ярилаа.
Рио Тинто компанийн Ерөнхий захирал Том Албаниз Монгол Улсын Ерөнхийлөгчид талархаад, “Дэлхийн олон оронд үйл ажиллагаа явуулж байгаа Рио Тинтогийн бүх үйлдвэр, компанууд аюулгүй ажиллагааг эрхэмлэдэг. Бид хүнд, байгальд, цаашлаад улс орны ирээдүйд “аюулгүй” үйл ажиллагаа явуулна гэдгээ дахин илэрхийлье.
Оюутолгой бол манай хамгийн сүүлийн үеийн техник технологи, шилдэг инженерүүдийг нэгтгэсэн үлгэр жишээ бүтээн байгуулалт байх болно” гэлээ. Тэрээр мөн, уул уурхайн салбарт монгол инженерүүдийг бэлтгэх талаар онцгой анхаарч байгаа гэдгээ хэлсэн.
Ерөнхийлөгч Ц.Элбэгдорж, уулзалтын төгсгөлд “20 жилийн турш Монгол Улсын нэрийн хуудас нь ардчилал, чөлөөт эдийн засаг байсан бол өнөөдрөөс эхлэн бидний хамтын ажиллагааны үр дүнд, хариуцлагатай, нээлттэй уул уурхай манай улсын бас нэгэн шинэ нэрийн хуудас болохын төлөө хамтран ажиллая” гэлээ.
Уулзалтанд “Рио Тинто Интернэшнл Холдингс Лимитед” компанийн Зэс, очир эрдэнийн бүлгийн Ерөнхий захирал Брэт Клейтон, “Айвенхоу Майнз Лимитед” компанийн ТУЗ-ийн дэд дарга Питер Мередит, “Айвенхоу Майнз Монголиа Инк” компанийн захирал Кийт Маршалл нар оролцлоо.
