Мөн энэ өдөр БНБУ-д суух Элчин сайдаар томилогдсон Ц.Ганхуяг Монгол Улсын Ерөнхийлөгчөөс итгэмжлэх жуух бичгээ гардан авлаа.
Манай хоёр орны харилцаа төдийлөн өргөн бус, эдийн засгийн харилцаа ёс төдий байгаа нөхцөлд Софид ЭСЯ ажиллуулж байгаагийн ач холбогдлыг харуулах ёстой гэж Ерөнхийлөгч зөвлөлөө. Монгол-Болгарын Засгийн газар хоорондын комиссын үйл ажиллагаа үр дүнтэй байхад анхаарлаа хандуулах хэрэгтэйг ч мөн хэлсэн юм.
Болгар бол хөдөө аж ахуйн орон. Ялангуяа жимс ногоо чиглэлийн жижиг дунд үйлдвэрлэлийн туршлагыг монголд нэвтрүүлэх хэрэгтэй. Түүнчлэн тус улсад оюутан суралцуулж ирсэн уламжлалыг сэргээх нь Элчин сайдын нэг үүрэг байх ёстойг онцоллоо.
ЮНЕСКО-гийн Ерөнхий Нарийн Бичгийн даргаар Болгар хүн сонгогдож чадсан нь тус улсын олон талт хамтын ажиллагааны томоохон ололт юм. Монгол Улстай ижил төстэй, харьцангүй бага буурай орны хувьд гадаад бодлогодоо ийм том амжилт олсон туршлагыг судлах хэрэгтэй гэж Ерөнхийлөгч хэллээ.
Софи дахь ЭСЯ нь Румын, Албани, Македони, Грек, Кипр зэрэг орнуудыг хариуцдаг бөгөөд, Балканы хойгт байгаа ганц ЭСЯ-ны хувьд бүс нутгийн байдлыг анхаарч, судлах хэрэгтэй талаар мөн зөвлөв.
Элчин Сайд Ц.Ганхуяг бүрэн эрхийнхээ хугацаанд хийх ажлаа ерөнхийд нь төлөвлөсөн гээд, хоёр орны харилцааг өргөжүүлэх талаар бодож төлөвлөж байгаа ажлаасаа танилцуулсан юм.
