Монгол Улсын Ерөнхийлөгч Ц.Элбэгдоржид БНСУ-аас Монгол Улсад суугаа Онц бөгөөд Бүрэн эрхт Элчин сайд Жөн Ир эх орондоо бүрмөсөн буцахтайгаа холбогдуулан өнөөдөр бараалхлаа. Элчин сайд Жөн Ир цаг гарган хүлээн авсанд нь Ерөнхийлөгчид талархал илэрхийлээд таны явуулж байгаа бодлого, үйл ажиллагааг анхааралтай ажиглаж байдаг гэж хэлэв.
Ялангуяа цаазаар авах ялыг халж, шүүхийн шинэчлэл хийж, мөн Монгол Улс эдийн засгийн өсөлтөөрөө тэргүүлэх орнуудын тоонд орж чадсан амжилтын үед Элчин сайдаар ажилласандаа баяртай байна. Энэ хугацаанд хоёр орны харилцааг тодорхой чиглэлээр шат ахиулж чадсандаа сэтгэл хангалуун байна хэмээн тэрээр хэллээ.
Элчин сайд таныг ажиллах хугацаанд манай хоёр орны харилцаа, хамтын ажиллагаа их идэвхтэй өрнөсөн. Хоёр орны эдийн засгийн харилцаа, худалдаа, соёл, боловсрол, иргэд хоорондын холбоо маш идэвхтэй байсныг цохин тэмдэглэе.
Өнгөрсөн хугацаанд олон чухал үйл явдал болсон. Тэдгээрээс хамгийн чухал нь БНСУ-ын Ерөнхийлөгч Ли Мен Баг төрийн айлчлалаар Монгол Улсад ирсэн явдал юм. Тэр айлчлалаар харилцаа иж бүрэн түншлэлийн түвшинд хүрч, мөн хамтын ажиллагааны дунд хугацааны хөтөлбөрийг байгуулсан . Энэ нь харилцааг цаашид шинэ шатанд гарган хөгжүүлэхэд чухал ач холбогдолтой болсныг тэмдэглэхийг хүсч байна.
Хөгжлийн албан ёсны тусламж ч ихээхэн нэмэгдлээ. Ардчилсан орнуудын хамтын нийгэмлэгийг Монгол Улс даргалж байгаа тул Ерөнхийлөгчтэй энэ асуудлаар ярилцаж, “Ардчиллын төлөөх Азийн түншлэл”-ийн санаачилгыг хамтран дэвшүүлсэн. Энэ санаачилгыг дэмжин Солонгосын тал Жэжүгийн чуулга уулзалтаар тусгайлан ярилцах санал гарган ажиллаж байгаад талархаж байна. Үүнд бид маш их баяртай байгаа. Монгол Улс идэвхтэй оролцох болно.
Ази тивд ардчиллыг бэхжүүлэх чиглэлээр Сөүл хотноо энэ долоо хоногийн эхээр болсон хурлын үеэр олон тооны эрдэмтэд, түүний дотор Монголын төлөөлөгчид оролцож, санал солилцсоныг тэмдэглэхэд таатай байна.
Цаашид хоёр орны харилцаа, хамтын ажиллагааны түвшинд ахиулах ажил их байгаа. Ялангуяа дээд түвшинд тохирсон дунд хугацааны хөтөлбөрийг хэрэгжүүлэх, хамтарсан мэдэгдэлд тусгасан худалдаа, эдийн засгийн асуудлуудыг ажил хэрэг болгох, Монголд нүүрс хийжүүлэх, аж үйлдвэрийн бүс байгуулах, Засгийн газар хоорондын зөвлөлдөх байнгын бүтэц бүрдүүлэх, худалдааг либералчлах, хөдөө аж ахуй, дэд бүтэц, эрүүл мэнд, байгаль орчин зэрэг салбарт хамтын ажиллагааг гүнзгийрүүлэх нь чухал байна. Хэрэгжүүлж буй зүйлүүд ч бий. Гэхдээ эрчимжүүлэх шаардлагатай байна.
Өөр нэг эрх ашиг нэгддэг зүйл бол Зүүн хойд Азийн бүсийн эдийн засгийн хамтын ажиллагааг идэвхжүүлэх явдал юм. Ингэхийн тулд төмөр зам, цахилгаан дамжуулах өндөр хүчдэлийн шугам, хийн болон нефтийн хоолой, хурдны зам зэрэг дэд бүтцийн томоохон төслүүдийг хэрэгжүүлэх чиглэлээр стратегийн ач холбогдол бүхий яриа хэлэлцээг Монгол Улс, Бүгд Найрамдах Солонгос Улсын хооронд санаачлан эхлүүлэх, улмаар бүс нутгийн бусад улсыг урьж оролцуулах талаар тодорхой санал боловсруулж ажиллах хэрэгтэй байна. Энэ бол хоёр орны хамтын ажиллагааг хөгжүүлэхэд ихээхэн хэрэгтэй.
Та буцаж очоод Ли Мен Баг Ерөнхийлөгчтэй уулзах байх. Бид сайхан танилцаж найз нөхөд болсон. Ерөнхийлөгчтэй ярилцсан зүйлүүддээ сэтгэл их хангалуун байна. Миний мэндийг Ли Мен Баг Ерөнхийлөгчид дамжуулж өгөхийг хүсье.
Та энд ажиллах хугацаандаа их зүйл хийж, олон найз нөхөдтэй болсон байх. Элчин сайдын ажил дуусч байгаа ч Монгол Улстай хамтрах, харилцах чиглэлээр цаашдаа ч их хувь нэмэр оруулна гэж бодож байна. Таны цаашдын ажилд амжилт хүсье гэж Монгол Улсын Ерөнхийлөгч Ц.Элбэгдорж хэллээ.
Мэдээний том зургуудийг татаж авна уу
http://www.president.mn/2012_02_17zurag.rar
