Монгол Улсын Ерөнхийлөгчийн санаачилсан “Архигүй Монголын төлөө хамтдаа” уриалгыг хэрэгжүүлэх ажлын хүрээнд улс орон даяар өрнөсөн аяныг эрчимжүүлэх зорилгоор Ерөнхийлөгчийн Тамгын газраас 2011 оны арванхоёрдугаар сард нийслэлийн Иргэдийн төлөөлөгчдийн хурлын дарга, нийслэлийн Засаг дарга бөгөөд Улаанбаатар хотын захирагч нарт албан бичиг илгээн Архидан согтуурахтай тэмцэх тухай хууль зөрчсөн НИТХ-ын 2010 оны “Санал хүсэлтийн мөрөөр авах арга хэмжээний тухай” 123 дугаар тогтоолыг хүчингүй болгохыг шаардсан билээ.
Энэхүү албан шаардлагын дагуу нийслэлийн Иргэдийн төлөөлөгчдийн хурлын тэргүүлэгчид хууль зөрчсөн дээрх тогтоолыг 2012 оны нэгдүгээр сарын 27-нд хүчингүй болгосноо Ерөнхийлөгчийн Тамгын газарт мэдэгдэв.
Ингээд согтууруулах ундаа худалддаг, түүгээр үйлчилгээ явуулдаг аж ахуйн нэгжүүдийн ажиллах цагийн хуваарийг шинэчлэн мөрдөж эхэлсэн байна. Энэ хуваарийн дагуу кафе оройн 22 цагт, хүнсний худалдаа, зоогийн газар, баар /диско клуб, караоке, шоу тоглолт бүхий газрууд/ 24 цагт үйлчилгээгээ зогсоон хаах болжээ.
