Монгол Улсын Ерөнхийлөгч Ц.Элбэгдорж цагаан сарын шинийн нэгэнд төрийн ордонд хүрэлцэн ирж, төрийн есөн хөлт цагаан туганд хүндэтгэл үзүүлнэ. Дараа нь Ерөнхийлөгч төрийн хүндэтгэлийн өргөөнд морилж, төрийн хар нумыг эгшээсний дараа суудалдаа тухлахад Улсын Их Хурлын дарга Д.Дэмбэрэл, Ерөнхий сайд С.Батболд нар хүрэлцэн ирж, амар мэндийг нь эрэн золгож, хөөрөг зөрүүлэн хууч хөөрнө.
Монгол Улсын соёлын гавьяат зүтгэлтэн Ц.Цэрэндорж төрийн хан хуурыг эгшэглүүлэн цэнгүүлж, төр түмэндээ өргөх айлтгал магтаалыг аялгуулна.
Монголын бурхан шашинтны төв Гандантэгчинлэн хийдийн тэргүүн хамба, гавьж Д.Чойжамц, Дашчойлон хийдийн тэргүүн хамба Ч.Дамбажав нар төрийн хүндэтгэлийн өргөөнд ирж, Ерөнхийлөгч, УИХ-ын дарга, Ерөнхий сайд нартай золгон амар мэндээ мэдэлцэнэ.
Ерөнхийлөгч Монголын бурхан шашинтны төв Гандантэгчинлэн хийдийн тэргүүн хамбад монголын ард түмний буян заяаг даатгаж мандал өргөхийг хүснэ.
Ийнхүү төрийн золголтын ёслол үйлдээд Ерөнхийлөгч Ц.Элбэгдорж Улсын Их Хурлын дарга Д.Дэмбэрэл, Ерөнхий сайд С.Батболд нарын хамт ёслол хүндэтгэлийн танхимд очиж, ахмадуудтай уулзан амар мэндийг нь мэдэлцэж. гарын бэлэг өгөөд дурсгалын зураг татуулна.
