Төрийн шагнал хүртсэн бүтээлүүдийн бүтээгчид Бат-Эрдэнийн Батбаяр, Бирваагийн Мөнхболд нарт баяр хүргэе.
Монгол түмэн авъяас билэгтэй, өв их соёлтой, арвин баялаг түүхтэй, өөдрөг гэгээлэг ирээдүйтэй ард түмэн. Өнөөдөр Төрийн шагнал хүртэж байгаа бүтээлүүд нь монголчуудын түүх соёлын бахархлыг зузаатгаж чадсан даацтай бүтээлүүд.
Б.Батбаярын “Монголчууд: Нүүдэл суудал” дөрвөн боть бүтээл нь Монголд төрт ёс үүссэн цагаас эхлэн шинэ ардчилсан Үндсэн хууль батлагдах үеийг хамарсан, 10 мянга гаруй түүхэн баримт, эх сурвалжаас 1200 гаруй ишлэл багтаасан цогц бүтээл юм. Энэхүү бүтээл дэлхийн арав гаруй орны хэл дээр хэвлэгдээд байгаа. Баабарын бүтээл нь монголын их түүхэн дэх эрдэнэсийг олж нээж, түүх бичлэгийн шилдэг стандартын дагуу монголын их түүхийг олон нийтэд хүргэж чадсан Монголын түүх бичлэгт үзэгдэл болсон бүтээл. Нэг үгээр хэлбэл уул шиг бүтээл. Уулыг уул гэж нэрлэх хэрэгтэй.
Б.Мөнхболдын “Ятгын концерт”, “Төгөлдөр хуурын сонат”, “Морин хуурын концерт” симфони нь Монгол түмний оюуны гайхамшиг, сэтгэл авъяасын өвөрмөц тусгалыг дэлхийн сонгодогуудын түвшинд үнэлүүлж чадсан бүтээл гэж олон мэргэжилтнүүд үнэлж байна. Моцарт, Чайковский, Бахыг төрүүлсэн ард түмэн нь тэр авъяастнуудаа, уран бүтээлчдээ үнэлдэг. Хүн төрөлхтөн ч шүтдэг. Б.Мөнхболдын хөгжмийн энэ гайхамшигт бүтээлийг монголын төрөөс үнэлэх нь зүйтэй гэж үзсэн.
Та бүхний цаашдын уран бүтээлд улам их амжилтыг хүсэн ерөөе.
