Монгол Улсын Ерөнхийлөгч Ц.Элбэгдорж Холбооны Бүгд Найрамдах Герман Улсын Ерөнхийлөгч Ё.Гаукын урилгаар 2012 оны 3 дугаар сарын 28-наас 4 дүгээр сарын 01-ний өдрүүдэд Холбооны Бүгд Найрамдах Герман Улсад төрийн айлчлал хийнэ. Монгол Улсын Ерөнхийлөгчийн энэ удаагийн айлчлал нь Монгол Улсын төрийн тэргүүний түвшинд 12 жилийн дараа хийгдэх гэж байгаа айлчлал бөгөөд ХБНГУ-ын Канцлер А.Меркелийн Монгол Улсад хийсэн албан ёсны айлчлалын дараахан болж байгаагаараа онцлог юм.
Айлчлалын үеэр Монгол Улсын Ерөнхийлөгч Ц.Элбэгдорж Холбооны Бүгд Найрамдах Герман Улсын Ерөнхийлөгч Ё.Гауктай хоёр талын уулзалт хийнэ. Монгол Улсын Ерөнхийлөгч Ц.Элбэгдоржид Холбооны Бүгд Найрамдах Герман Улсын Канцлер А.Меркель, Бундестагийн Ерөнхийлөгч Н.Ламмерт, Берлин хотын Захирагч К.Вовэрайт, Хамбург хотын Захирагч О.Шольц нар бараалхана.
Монгол–Германы иж бүрэн түншлэлийн харилцаа, хамтын ажиллагааг өргөжүүлэн хөгжүүлэх, эдийн засаг, худалдаа, хөрөнгө оруулалт, соёл, боловсролын салбар дахь хамтын ажиллагааг идэвхжүүлэн хөгжүүлэхэд энэхүү айлчлал нь чухал ач холбогдолтой юм.
