Жил бүр олгодог Монгол Улсын Ерөнхийлөгчийн нэрэмжит оны шилдэг залуу эмчийн шагналыг өнөөдөр Ерөнхийлөгчийн тамгын газрын дарга Д.Баттулга гардууллаа.
Энэ удаагийн шилдэг залуу эмчийн шагналыг орон нутагт ажиллаж байгаа эмч нар маань түлхүү хүртсэн байна. Хөдөө орон нутгийн ард иргэдэд эмнэлгийн нарийн мэргэжлийн тусламж үйлчилгээг шуурхай, хүртээмжтэй хүргэхийн сацуу “Тикийн оношлогоо, эмчилгээний асуудалд” сэдвээр эрдэм шинжигээний бэсрэг бүтээл туурвиж олон улсын сэтгүүлд нийтлүүлэх, тархины цус харвалттай өвчтөнүүдэд “Судасны агшил тавиулах” эмчилгээг үр дүнтэй хийж эмчилгээ, үйлчилгээний чанарт мэдэгдэхүйц дэвшил гаргасан амжилтаар Увс аймгийн нэгдсэн эмнэлгийн их эмч Сэмбэрүүний Булгамаа, Цусны эргэлт, зохиомол амьсгалыг удирдах, инвазив ажилбарууд болон хагалгааны мэдээгүйжүүлэгийг мэргэжлийн өндөр түвшинд гүйцэтгэх зэргээр эрчимт эмчилгээ, яаралтай тусламжийн үйлчилгээг цаг алдалгүй хүргэж олон хүний амь нас, эрүүл мэндийг аврахад оруулсан амжилтаар Улсын клиникийн төв эмнэлгийн яаралтай тусламж, сургалт арга зүйн төвийн их эмч Гомбын Отгонтуяа, Эрүүл мэндийн хоёр дахь шатны тусламж үйлчилгээг чанартай, чадварлаг үзүүлж хүүхдийн эрүү, нүүр, шүдний өвчлөлийг бууруулах, эмчлэх талаар эмчилгээний дэвшилтэт аргуудыг шинээр нэвтрүүлж, хүн ардын эрүүл мэндийг хамгаалах үйлс, эрхэлсэн ажилдаа өндөр амжилт гаргасан Завхан аймгийн нэгдсэн эмнэлгийн их эмч Бямбажавын Энхзаяа нар 2012 оны шилдэг залуу эмч өргөмжлөлийн эзэд боллоо.
