Өнөөдөр мөн Монгол Улсын Ерөнхийлөгч Ц.Элбэгдорж, “Иргэдийн шударга шүүх” ТББ-ын төлөөллийг хүлээн авч уулзлаа. Тус байгууллагынхан, иргэний оролцоо болон хяналтын талаар Монгол Улсын Ерөнхийлөгчтэй адил байр суурьтай байдгаа илэрхийллээ.
“Иргэдийн шударга шүүх”-д төрийн албан хаагчдын хүнд суртал болон хууль, шүүхийн байгууллагуудын хууль зөрчсөн шийдвэрийн талаар иргэдээс ирж байгаа гомдол мэдээллүүд бараг 10 мянга орчим болжээ. Төр засаг иргэнийхээ зөрчигдсэн эрхийг хамгаалагч нь биш, харин өөрөө иргэний эрхийг зөрчигч нь болсон байна гэж дүгнэж байгаагаа тус ТББ-ын тэргүүн Х.Бат-Ялалт илэрхийлээд, зарим тодорхой саналуудаа хэллээ. Тухайлбал, төрийн албан хаагч төрийн албан хаагчидаа хяналт тавьж байгаа нь хариуцлагыг сулруулж байна. Зүй нь энэ хяналтыг иргэд хийх ёстой бөгөөд, ингэхийн тулд “Мэдээллийн нэгдсэн сүлжээ”тэй болох нь зөв гэж үзэж байгаа юм байна. Мөн иргэний эрхийг хэн гэдэг ямар албан тушаалын төрийн албан хаагч зөрчсөнийг тогтоох ажлын хэсэг байгуулах саналтай байгаагаа хэллээ.
Монгол Улсын Ерөнхийлөгчийн дэргэд “Иргэний танхим” байгуулагдаж байгаа нь нүдээ олсон зөв үйл ажиллагаа болж байна гэж үзэж байгаагаа энэ уулзалтын үеэр “Иргэдийн шударга шүүх” ТББ-ынхан илэрхийлсэн юм.
Хүний эрх, шүүх эрх мэдлийг шинэчлэх бодлого болон бусад асуудлаар Ерөнхийлөгчтэй санал солилцон, харилцан ярилцлаа.
