Ерөнхийлөгч Монголын Хараагүйчүүдийн Үндэсний Холбооны төлөөлөгчдийг хүлээн авч уулзлаа. Уулзалтад тус холбооны Ерөнхийлөгч М.Баясгалан, Ерөнхий нарийн бичгийн дарга Д.Гэрэл, Хараагүй хүмүүсийн хөдөлмөр сургалтын төвийн захирал З.Болдсайхан нар оролцлоо.
Манай улсад нийтдээ 8000 орчим хараагүй иргэдтэй. Тэдгээр иргэдийн өмнө тулгамдсан даруй шийдвэрлэвэл зохих олон асуудлууд байгааг тус холбооныхон Монгол Улсын Ерөнхийлөгчид танилцууллаа.
Тухайлбал, хөгжлийн бэрхшээлтэй иргэдэд зориулсан “халамжийн орон сууц” хөтөлбөр санаачлах тухай, мөн “Оны шилдэг хүмүүнлэг үйлстэн байгууллага” шалгаруулж байх тухай болон хараагүй хүмүүсийн сургалт-үйлдвэрлэлийн төвүүдийг дэмжих, тэдний үйлдвэрлэсэн бүтээгдэхүүнийг зах зээлд нийлүүлэхэд тодорхой хөнгөлөлт хэрэгтэй байгааг онцоллоо.
ХХХСТ нь одоогийн байдлаар 100 гаруй ажилчидтай бөгөөд тэдгээрийн 80 гаруй хувьд хараагүй иргэд ажилладаг байна. Ерөнхийлөгч тус холбооны зүгээс санал болгож буй ажил хэрэгч санаачлагуудыг дэмжээд цааш цаашдаа хамтран ажиллах болно гэдгээ илэрхийлэв.
