Монгол Улсын Ерөнхийлөгч Цахиагийн Элбэгдорж Дэлхийн мал, амьтны эрүүл мэндийн байгууллага /ДМАЭМБ/-ын ерөнхий нарийн бичгийн дарга доктор Бернард Валлатыг хүлээн авч уулзлаа. Ерөнхийлөгч Ц.Элбэгдорж , доктор Б.Валлатад хандаж 2009 оны 12-р сард албан захидал илгээн, Монгол Улс , ДМАЭМБ-ын хамтын ажиллагааны талаар тодорхой санал тавьсан бөгөөд Б.Валлатыг Монгол Улсад айлчлахыг албан ёсоор урьсны дагуу тэрээр энэ өдрүүдэд манай улсад айлчилж байгаа билээ.
Ноён Б.Валлат ярихдаа “ Эрхэм Ерөнхийлөгч Та намайг өөрийн эх орондоо урьсанд баярлалаа. Энэхүү айлчлал нь манай байгууллагын зүгээс та бүхэнтэй хамтын ажиллагаагаа өргөжүүлэх шинэ шинэ боломжууд байгааг ойлгуулсан үр дүнтэй айлчлал болж байна. Монгол бол нүүдлийн мал аж ахуй эрхэлдэг, нэг хүн амд ногдох мал амьтны тоогоор өндөр, малын гаралтай бүтээгдэхүүн, хүнс экспортлох өргөн боломжтой орнуудын нэг гэдэг утгаараа Дэлхийн мал, амьтны эрүүл мэндийн байгууллагын зүгээс онцгой анхаарал хандуулдаг арван орны нэг юм.
Ерөнхийлөгч таны санал болгосноор бид Монгол Улсын тодорхой бүс нутагт, тодруулбал баруун бүсийг “эрүүл бүс”-ээр зарлах суурь ажлуудыг хийж эхлээд байна. Ингэснээр Монгол Улсаас малын гаралтай бүтээгдэхүүнийг гадаад оронд экспортлох бодит боломж нээгдэх юм. “Эрүүл бүс”-ээр зарлахын тулд юуны өмнө мал эмнэлгийн тухай болон бусад холбогдох хууль тогтоомжуудыг өөрчлөх зайлшгүй шаардлагатай байна. Мөн бид шинжээчдээ монголд ажиллуулж, холбогдох баримт бичгийг бэлэн болгосны дараа 2013 оны 5-р сард Монгол Улсын баруун бүсийг “эрүүл бүс”-ээр зарлах санал хураалт явуулах юм.
ДМАЭМБ нь Монгол Улсын Засгийн газартай хамтран мал эмнэлгийн салбарыг дэмжих, малыг эрүүлжүүлэх, хүнсний аюулгүй байдлыг сайжруулах чиглэлээр төсөл хэрэгжүүлэхээр тохирсон бөгөөд шаардлагатай төсөв мөнгөний асуудлыг Дэлхийн банк болон бусад хандивлагчдын тусламжтайгаар шийдэж болох юм” гэж ярилаа.
Ерөнхийлөгч Ц.Элбэгдорж ноён Б.Валлаттай санал нэг байгаагаа илэрхийлээд зарим ажлуудыг хугацаа алдалгүй эхлүүлэх нь зүйтэй гэлээ. Тухайлбал, мал эмнэлгийн болон бусад холбогдох хууль тогтоомжуудыг шинэчлэх үүнд ДМАЭМБ-ын шинжээч, мэргэжилтнүүдийг оролцуулах, малын өвчинтэй тэмцэх, эрүүлжүүлэх чиглэлээр хөтөлбөр боловсруулах, энэ чиглэлээр хөрөнгө оруулалтыг шийдвэрлэх, олон улсын байгууллага хандивлагчдын анхаарлыг хандуулахад ДМАЭМБ-ын дэмжлэг туслалцааг авахаар болов. Түүнчлэн нүүдийн соёл иргэншилтэй бэлчээрийн мал аж ахуйн тогтолцооны онцлогыг харгалзсан мал амьтны эрүүл мэндийн стандартыг боловсруулахад хамтран ажиллахаар ярилцаж тохирлоо.
