Монгол Улсын Ерөнхийлөгч Ц.Элбэгдорж Унгар Улсын Ерөнхийлөгчөөр сонгогдсон Адер Яношт баяр хүргэн захидал илгээв. Захидалд “Унгар Улсын Ерөнхийлөгчөөр сонгогдсонд Танд чин сэтгэлийн баяр хүргэж буйг минь хүлээн авна уу.
Манай хоёр орны найрсаг харилцаа, хамтын ажиллагааг монгол, унгарын ард түмний эрх ашигт нийцүүлэн хөгжүүлэх эрхэм үйлсийн төлөө Тантай хамтран ажиллахдаа би баяртай байна.
Эрхэмсэг ноён Ерөнхийлөгч Таныг Монгол Улсад албан ёсоор айлчлахыг урьж буйгаа үүгээр нотлохын хамт Таны айлчлал Монгол, Унгарын олон жилийн харилцаа, хамтын ажиллагааны хөгжилд дорвитой түлхэц өгнө гэдэгт миний бие итгэл төгс байна.
Энэ ялдамд Эрхэмсэг ноён Ерөнхийлөгч таны нэн өндөр хариуцлагатай шинэ албан ажилд амжилт, найрсаг унгарын ард түмэнд хөгжил цэцэглэлтийн ерөөл дэвшүүлье” гэжээ.
