Монгол Улсын Ерөнхийлөгчийн дэргэдэх “Иргэний танхим”-д “Төсөв санхүү- Иргэний оролцоо” сэдвээр нээлттэй хэлэлцүүлэг хийж, шинээр боловсруулсан “Орон нутгийн хөгжлийн сангийн журам”-ын талаар ярилцсан юм. Уг хэлэлцүүлгийг нээж, Монгол Улсын Ерөнхийлөгчийн ахлах зөвлөх П.Цагаан үг хэллээ. Тэрээр хэлэхдээ “Энэ танхимд хүрэлцэн ирсэн та бүхний өглөөний амгаланг айлтгая. Монгол Улсын Ерөнхийлөгч Цахиагийн Элбэгдоржийн санаачилгаар Монгол Улсын Их Хурлаас төсвийн хууль тогтоомжийг шинэчлэн орон нутгийн төсөв, санхүүгийн тогтолцоон дахь төвлөрлийг сааруулах чиглэлээр томоохон өөрчлөлтүүд хийж байгаа билээ.
Энэ хүрээнд өнгөрсөн оны сүүлээр “Төсвийн байгууллагын удирдлага санхүүжилтийн тухай хууль”-ийг өөрчлөн “Төсвийн тухай хууль” болгон шинэчилсэн бөгөөд хууль тогтоомжийг шинэчлэх ажилд Монгол Улсын Засгийн газар, ялангуяа Сангийн яам, тус яамны мэргэжилтнүүд чухал үүрэг гүйцэтгэснийг тэмдэглэх хэрэгтэй. Энэ ажилд Дэлхийн банк, тус байгууллагаас монголд хэрэгжүүлж байгаа төсөл болох “Тогтвортой амжиргаа II төсөл”-ийн хамт олон онцгой хүчин чармайлт гаргаж байгааг онцлон тэмдэглэхийг хүсч байна.
Төсвийн тухай шинэ хуулийн дагуу улсын төвлөрсөн төсвөөс үлэмж хэмжээний хөрөнгийг томъёонд суурилсан шилжүүлгээр орон нутагт жил бүр шилжүүлэх шинэ тогтолцоо руу бид 2013 оны 1 дүгээр сарын 1-ний өдрөөс шилжих юм. Энэ бол орон нутгийн бие даасан байдлыг хангахад чиглэсэн том алхам болж байна.
Орон нутгийн бие даасан байдлыг бэхжүүлж нутгийн өөрөө удирдах ёс хөгжихөд хөрөнгө, санхүүгийн бие даасан байдал тэргүүлэх ач холбогдолтой гэдэгтэй маргах хүн гарахгүй биз. Монгол Улсын Ерөнхийлөгч Ц.Элбэгдоржийн мөрийн хөтөлбөрийн нэг чухал хэсэг нь орон нутгийн бие даасан байдлыг бэхжүүлэх, төвлөрлийг сааруулах явдал юм.
Өнөөдөр Монгол Улсын Ерөнхийлөгчийн дэргэдэх “Иргэний танхим”-д та бид ээлжит нээлттэй хэлэлцүүлгээ хийх гэж байна. Энэ удаагийн хэлэлцүүлгээр шинээр батлагдсан “Төсвийн тухай хууль”, хууль шинээр батлагдсантай холбоотой үүсч буй шинэ нөхцөл байдал, орон нутгийн төсөв, түүнийг төлөвлөх, бүрдүүлэх, захиран зарцуулах, тайлагнах, хяналт мониторинг хийх үйл ажиллагааг хэрхэн олон түмэн иргэдийн оролцоотойгоор зохион байгуулах тухай асуудлуудыг хөндөх болно. Энэ дашрамд одоогоор орон нутагт байгуулагдсан 18, дүүргүүдийн 4 “Иргэний танхим”-аар Монголын Үндэсний олон нийтийн телевизээр дамжуулан зэрэг хэлэлцэж байгааг дуулгахад таатай байна.
Төсвийн тухай шинэ хуулийг хэрэгжүүлэх ажлын урьдчилсан бэлтгэлийн ажлын хүрээнд Ерөнхийлөгчийн Тамгын газар, Сангийн Яам, иргэний нийгмийн байгууллагууд, судлаачид хамтран хэд хэдэн ажлын хэсэг байгуулсны нэг нь “Орон нутгийн хөгжлийн сангийн үйл ажиллагааны журам боловсруулах ажлын хэсэг” бөгөөд тус ажлын хэсгийн боловсруулсан “Орон нутгийн хөгжлийн сангийн журам”-ыг энэ удаа нээлттэй хэлэлцэж эцсийн хувилбарыг боловсруулна.
Шинэ хуулийг танилцуулах сургалтын хүрээнд уг журмыг орон нутгийн захиргааны ажилтнуудад танилцуулж тэдний саналыг сонссон. Сургалтад оролцогчид журмыг сайжруулахад хэрэг болох олон санал санаачилга гаргасныг бид талархалтай хүлээн авч байгаа. Өнөөдрийн хэлэлцүүлгээс ч үнэтэй санал, санаачилга гарна гэдэгт итгэлтэй байна.
Энэ удаагийн хэлэлцүүлэгт оролцож байгаа бүх хүнд Монгол Улсын Ерөнхийлөгчийн нэрийн өмнөөс талархал дэвшүүлж байгааг минь хүлээн авна уу?
Та бүхэнд амжилт хүсье. Анхаарал тавьсанд баярлалаа” гэв.
Оролцогчид хэлэлцсэн асуудлаар олон санал гаргалаа. Тэдгээрийг нягтлан судалж, журмын төсөлд тусгах болно хэмээн хэлэлцүүлэг зохион байгуулагчид хэлэв.
