МОНГОЛ УЛСЫН ЕРӨНХИЙЛӨГЧ АВИЛГЫН ЭСРЭГ ТЭМЦЭЛД ДЭМЖЛЭГ ҮЗҮҮЛЭХИЙГ ОЛОН УЛСАД УРИАЛЛАА
Ерөнхийлөгч асныг шүүж буй явдал нь ил тод байдал, хууль дээдлэх ёс Монголын ардчилалын суурь зарчим болон төлөвшиж байгааг илтгэж байна.
Улаанбаатар, Монгол Улс – Ерөнхийлөгчийн Тамгын газраас мэдэгдэх нь:
Монгол Улсын Ерөнхийлөгч Цахиагийн Элбэгдорж өнөөдөр Нэгдсэн Үндэстний Байгууллага, Европын холбоо, Америкийн Нэгдсэн Улс болон Монгол Улсын олон улсын бусад түншүүдэд хандан авилгын эсрэг өрнүүлж буй Монгол Улсын тэмцэл, хүчин зүтгэлийг дэмжихийг уриаллаа.
Өнгөрөгч хавар Монгол Улсын Эрүүгийн хуулийн авилга, хээл хахуулийн хэрэгтэй холбоотой зүйл ангиуд дээр үндэслэн Монгол Улсын Авилгатай тэмцэх газраас \АТГ\ Ерөнхийлөгч асан Н.Энхбаярт олон удаагийн зарлан дуудах хуудас илгээснийгтэрбээр хүлээн авахаас татгалзан, үл тоомсорлосон учиртүүнийг баривчилсан билээ.
Одоогоос нэг жил гаруйн өмнө буюу 2011 оны 5 дугаар сард АТГ-аас Н.Энхбаярт анхны зарлан дуудах хуудсыг хүргүүлснээс хойш түүнийг албаны эрх мэдлээ хэтрүүлэх, албан тушаалаа урвуулан ашиглах замаар, төрийн өмч хөрөнгө шамшигдуулсан болон үрэгдүүлсэн, авилга хээл хахуультай холбоотой бие даасан 27 хэрэгт түүнийг холбогдуулан шалгаснаас тавд нь Н.Энхбаярыг яллагдагчаар татаад байсан юм.
Ерөнхийлөгч Ц.Элбэгдорж ардчилсан бусад орнуудад хандан Монголд хуулийн үйл ажиллагааг зохих ёсны дагуу явуулахын сацуу, шүүхийн нээлттэй, ил тод үйл ажиллагааг аливаа саад бэрхшээлгүй явуулах хэрэгцээ шаардлагыг ойлгож, дэмжихийг уриаллаа.
Н.Энхбаяр энэ 4 дүгээр сарын 13-ны өдөр баривчлагдсанаас хойш түүний хууль зүйн туслалцаа авах болон гадаад, дотоодын хэвлэл мэдээллийн байгууллагатай харьцах эрх байнга нээлттэй байсан. Түүнтэй хүний эрхийг дээдлэн, хүндэтгэлтэйгээр харьцаж, Монгол Улсын Үндсэн хуулиар эрүүгийн хэргийн яллагдагчид олгосон бүхий л эрхийг олгож байсан билээ. Н.Энхбаяр нь одоогоор батлан даалтад гараад байгаа ба түүнийг шүүх хурал 6 дугаар сарын 12-ны өдөр товлогдоод буй.
Монгол Улсын Сонгуулийн ерөнхий хороо \СЕХ\ 6 дугаар сарын 6-ны өдрийн хуралдаанаараа Н.Энхбаярын сонгуульд нэр дэвших асуудлыг хэлэлцэж, 8:1 саналын харьцаатайгаар Н.Энхбаяр нь эрүүгийн гэмт хэрэгт сэжигтнээр татагдан шалгагдаж буй учир Улсын Их Хурлын сонгуульд нэр дэвших шаардлагыг хангахгүй хэмээн үзэж, нэр дэвшигчээр бүртгэхээс татгалзсан шийдвэрийг гаргасан юм.
СЕХ нь бие даасан, хараат бус байгууллага бөгөөд тус хорооны дарга, гишүүдийг Улсын Их Хурлаас томилдог юм.
Олонулсын хэвлэл мэдээллийн хэрэгслээр Н.Энхбаярын зүгээс тун нарийн зохион байгуулалттайгаар цацсан мэдээ, мэдээлэл нь үнэнээс дэндүү гажсан, үндэслэлгүй, хэт нэг талыг баримталсан мэдээлэл байсан юм.Үнэн хэрэгтээ Монголын төр Н.Энхбаяр, түүний нэр төрд гүн хүндэтгэлгээр хандаж ирсэн билээ.
Мөрдөн байцаалт, баривчилгаа, тулгаж буйялтай нь холбоотой баримт мэдээллийг Н.Энхбаяр болон түүнийг дэмжигчиддэлхийн олон нийтийн мэдээллийн хэрэгслээр хэт гажуудуулан мэдээлж буйтай холбогдуулан Монгол Улсын Ерөнхийлөгч Цахиагийн Элбэгдорж өнөөдөр дараах мэдэгдэл гаргалаа.
“Монгол Улсын Ерөнхийлөгчийн албыг хүлээн аваад гаргасан хамгийн анхны зарлигтаа миний бие иргэний боловсролыг дээшлүүлэн, ардчилал, хүний эрх, эрх чөлөөг Монголын ард түмний эрхэмлэн дээдлэх үнэт зүйл болгон бататгахтухай заасан билээ. Түүнчлэн Монгол Улсад цаазаар авах ялыг халах талаар идэвхтэй арга хэмжээ авч хэрэгжүүлэн, үр дүнд хүрч, өнгөрсөн оны эхээр АНУ-ын Төрийн нарийн бичгийн дарга Хиллари Клинтон манай улсын төр засгаас иргэний эрхийг хамгаалах талаар гаргасан амжилтыг цохон тэмдэглэсэн. Монгол Улс болон АНУ нээлттэй харилцаж эхэлсний 25 жилийн ой энэ хавар тохиож, хууль ёсыг дээдлэх, засаглалын ил тод байдлыг эрхэмлэх, хүний эрхийг дээдлэх нэгдмэл итгэл үнэмшлийн маань баяр давхар болж буй билээ. Монголдардчилалыг бэхжүүлэн хөгжүүлэхэд бидний Америк анд нөхдийн зүгээс байнга туслалцаа үзүүлж ирсэн бөгөөд, энэ удаад ч АНУ болон Европын анд нөхөд маань Монгол дахь ардчилсан системийн хамгийн том дайсан болоод буй авилгын эсрэг явуулж буй бидний тэмцлийг ойлгон дэмжинэ гэдэгт эргэлзэхгүй байна.”
“Монголын ардчилал цаашид өсөн хөгжиж, бэхжих эсэх нь дэлхийн хөгжиж буй олон оронд нүүрлээд буй авилгын аюулыг сөрөн зогсож чадах эсэхээс ихээхэн хамаарна. Н.Энхбаярын хэрэг нь төрийн өндөр албан тушаалтнуудтай холбоотой20 орчим хэргийн ердөө л нэг нь. Хүний эрх, эрх чөлөө авилгатай зэрэгцэн орших боломжгүй. Хүний эрх, эрх чөлөө, хууль дээдлэх ёсон эргэлт буцалтгүй байдгийн нэгэн адил авилгын эсрэг тэмцэлд ч мөн эргэх зам байхгүй. Хууль хэн нэгнийг онцгойлон үзэлгүйгээр, хүн бүрт тэгш үйлчлэх ёстой. Төрийн өндөр албан тушаалтнуудаас эхлээд энгийн иргэн хэнбугай ч хуульт ёсноос ангид байдаггүй нь ардчиллын үндсэн зарчмуудын нэг мөн” хэмээн Ерөнхийлөгч Ц.Элбэгдорж хэлжээ.
“Дэлхийн ардчилсан орнуудын ард иргэдэд хандан энэхүү шүүх ажиллагааг анхааралтай ажиглаж, баримтуудыг үнэн бодитоор нь хүлээн авахын сацуу Н.Энхбаярын эсрэг нотлох баримтууд хууль ёсны дагуу шүүх хурал дээр дэлгэгдэх хүртэл яаран дүгнэлт хийхгүй байхыг уриалж байна. Монгол Улс орчин үеийн, ардчилсан орон болж хөгжихийн тулд бидэнд дэлхийн ардчилсан хамтын нийгэмлэгийн болон анд нөхдийн маань туслалцаа зайлшгүй шаардлагатай. Шүүххурлын үеэр дэлгэгдэх баримт, мэдээллүүдэд бидний түнш, найз нөхөд анхаарал хандуулах нь нэн чухал юм.”
“Зургадугаар сарын 28-ны өдөр Монгол Улсын өнцөг булан бүрт иргэд ардчилсан эрхээ эдлэн, Улсын Их Хурал дахь өөрсдийн төлөөллийг сонгох болно. Бид олон улсын төлөөллийг аливаа саад хаалтгүйгээр сонгуулийн үйл явцыг ажиглаж, ардчилалыг бэхжүүлэх, хүний эрх, хууль ёсыг дээдлэхэд манай орны зүгээс гаргаж буй хүчин чармайлтын гэрч болохыг урьж байна.”
Ерөнхийлөгч Ц.Элбэгдорж “Монгол Улсад хүний эрх, эрх чөлөө бүрэн тогтнох эс бөгөөс шударга бус явдал, авилга хээл хахуульд идэгдсэн орон болох эсэх нь Монгол Улсын хөгжлийн энэ үе дэх амин чухал асуудал болоод байна” гэжээ.
Монгол Улсын авилгын эсрэг байгууллага буюу Авилгатай тэмцэх газар \АТГ\ нь 2006 онд Н.Энхбаярыг Ерөнхийлөгчийн алба хашиж байх үед байгуулагдсан юм. Эдүгээ АТГ нь төрийн ил тод байдлыг хангах, хариуцлагын тогтолцоог бэхжүүлэх болон Авилгын эсрэг НҮБ-ын конвенцийн зорилтуудыг хэрэгжүүлэхээр ажиллаж байна.
АТГ-ын дарга, түүний орлогчийг Улсын Их Хурлаас томилдог ба, УИХ дахь одоогийн олонх нь өмнө нь Н.Энхбаярын даргалж байсан Монгол Ардын Нам \МАН\ юм.
МОНГОЛ УЛСЫН ЕРӨНХИЙЛӨГЧ АВИЛГЫН ЭСРЭГ ТЭМЦЭЛД ДЭМЖЛЭГ ҮЗҮҮЛЭХИЙГ ОЛОН УЛСАД УРИАЛЛАА
