Тираннозавр “Батаар”-ын хувь заяаг шийдэв
АНУ-ын шүүхийн шийдвэрийн дагуу өнгөрсөн баасан гаригт Нью-Йоркийн Квинс дүүрэг дэх агуулахаас тираннозавр “Батаар”-ын араг ясыг хураан авсан. Cadogan-Tate Art байгууллагын агуулахад байсан энэхүү 2.43 метр өндөр, 7.31 метр урт араг яс нь өнгөрсөн тавдугаар сарын 20-нд “Heritage Auction”-ы дуудлага худалдаагаар 1.05 сая долларын үнэд хүрсэн билээ.
“Heritage Auction”-ы төлөөлөгч дээрх араг ясыг хураан авсан болохыг AFP агентлагт мэдээлжээ.
Тираннозавр “Батаар” нь 70 сая орчим жилийн тэртээ Цэрдийн галавын үед одоогийн Монголын говьд амьдарч байсан гэж эрдэмтэд үздэг. Түүний араг ясыг Их Британиас АНУ-ын Флоридад 2010 оны тавдугаар сард авчирсан байна. Манхэттэний прокурорууд тираннозавр “Батаар”-ын араг ясыг хураан авч, Монголд хүлээлгэн өгөх өргөдөл гаргасныг шүүгч Кевин Кастен хүлээн зөвшөөрчээ.
Монголын төр өөрийн газар нутгаас олдсон үлэг гүрвэлийн ясыг үндэсний өмч хэмээн үзэж, гадаадад экспортлохыг 1924 оноос хатуу хориглосон байна. Ерөнхийлөгч Ц.Элбэгдорж шүүхийн үйл ажиллагаа бүтэмжтэй байгаад сэтгэл хангалуун буйгаа илэрхийлээд, тираннозавр “Батаар”-ын үлдэгдэл нь Монголын ард түмний түүхэн өв соёлын салшгүй хэсэг хэмээн онцлов.
“Heritage Auction”-ы захирал Жим Халперин “Шүүхийн шийдвэрийг бид хүндэлж байна. Гэхдээ Флоридагийн иргэн Эрик Прокопигийн эрх ашгийг хохироохгүй шударга шийдвэр гаргах ёстой. Тэрбээр өмнө нь төдийлөн үнэд хүрэхээргүй байсан араг ясны хэлтэрхийнүүдийг жилийн турш цуглуулан чамгүй хэмжээний хөрөнгө зарцуулан байж тираннозавр “Батаар”-ыг сэргээн босгосон” хэмээжээ.
Тираннозавр “Батаар”-ын хувь заяаг шийдэв
