Сонгодог урлаг бол улс орны хөгжлийг тодорхойлдог гол салбар
Өнөөдөр Монгол Улсын Ерөнхийлөгч Ц.Элбэгдорж Сонгодог урлагийнхны төлөөлөл болсон Улсын Дуурь Бүжгийн Эрдмийн Театрын захирал Б.Сэргэлэн, Уран сайхны удирдагч Б.Жамъяандагва, удирдаач Ж.Бүрэнбэх нарыг хүлээн авч уулзлаа.
Тус театр байгуулагдаад 47 жил, Монгол оронд симфони, найрал хөгжим үүсээд 85 дахь жилтэйгээ золгож буй бөгөөд уулзалтын эхэнд Монгол Улсын Сонгодог урлагийн байгууллагын төлөөлөгчид Ерөнхийлөгчид өнөөгийн сонгодог урлагийн салбарын нөхцөл байдал, чиг хандлага болоод хүндрэл бэрхшээлүүдийн талаар дэлгэрэнгүй танилцуулав.
Тухайлбал, тэдний өмнө тулгамдаж буй чухал асуудал бол сонгодог урлагийн залгамж халаа болсон мэргэжлийн боловсон хүчинг сургаж бэлтгэх урлагийг “төрөлжүүлсэн” төрийн бодлого хэрэгтэй байгааг онцлов. Мөн тодорхой тооны чадварлаг боловсон хүчин урт удаан хугацааны турш бэлтгэгдэх боловч тэдгээр нь нийгмийн хангамж муу байгаагаас өөр орнуудын томоохон театруудад хүчин зүтгэх болж “оюуны шүүрэлт”-д өртсөөр байгааг хэллээ.
Ерөнхийлөгч Сонгодог урлагийнхны өмнө тулгамдаж буй асуудлуудыг анхааралтай сонсоод сонгодог урлагийг хөгжүүлэх, шинэ шатанд гаргах бүтээлч санаачилга, төсөл хөтөлбөрүүдийг дэмжин ажиллах болно гэдгээ илэрхийлэв. Мөн олон улсын түвшинд сонгодог урлагийг хэрхэн хөгжүүлж буй арга замуудыг судлан тодорхой ажил хэрэгч санал санаачлагатай ирвэл 400 орчим жилийн түүхтэй дэлхийн сонгодог урлаг, 45–хан жилийн дотор Манай оронд амжилттай хөгжиж ирсэн уламжлалыг улам бүр хөгжүүлэх боломжтойг дурьдав. Уулзалтын төгсгөлд УДБЭТ-ын Уран сайхны удирдагч Б.Жамъяандагва “Сонгодог урлаг бол улс орны хөгжлийг тодорхойлдог гол салбар бөгөөд өнөөдөр биднийг хүлээн авч уулзан сонгодог урлагийн хөгжилд анхаарлаа хандуулж байгаа Ерөнхийлөгчид талархаж байна” гэв.
