Монгол Улсын Ерөнхийлөгч Ц.Элбэгдорж Үндэсний их баяр наадмыг нээж үг хэлснийхээ дараа нээлтийн ёслолыг үзэж сонирхов. Наадмын хүчит бөхийн нэгийн даваа эхэлмэгц Монгол Улсын Ерөнхийлөгч Ц.Элбэгдорж, Тэргүүн хатагтай Х.Болормаа нар сурын харвааны асарт зочлон эрхий мэргэн харваачиддаа баяр хүргээд, уламжлал ёсоор дөрвөн сум тавьж, цэц мэргэнээ сорилоо.
Монгол Улсын Ерөнхийлөгч ийнхүү сурын харвааны асраар зочилсны дараа сэтгүүлчдийн өмнө очиж нийт монголчууддаа хандан үг хэлэхдээ:
“Эрхэм хүндэт монголчууд аа, эрхэм хүндэт наадамчид аа!
Өнөөдөр монгол түмний хүсэн хүлээсэн улсын маань үндэсний их баяр наадам сайхан эхэлж байна. Энэ жил эзэн Чингис хааны маань мэндэлсний 850 жилийн тэгш ой тохиож байгаа. Саяхан монголчууд эрх чөлөөт гайхамшигтай сонголтоо хийж, Улсын Их Хурал, нийслэлийн Иргэдийн төлөөлөгчдийн хурлаа бүрэлдүүлсэн. Удахгүй монгол түмний маань хараа Лондоны XXX олимп руу чиглэнэ ээ.
Ирэх жилүүд монголчуудын хувьд их бүтээн байгуулалтын, их аз жаргалтай сайн сайхан амьдралын олон ажил өрнөсөн жилүүд болно гэдэгт би эргэлзэхгүй байна.
Зөвхөн Монгол Улсад төдийгүй хилийн чанадад газар газар маш олон монголчууд өнөөдөр наадмаа хийж байгаа. Тэр хүмүүстэй Монгол Улсынхаа нийслэлээс, “Сурын харвааны эрч хүчин” гэсэн энэ талбайгаас мэндчилж, сайхан наадахын өлзийтэй ерөөлийг өргөн дэвшүүлье.
Мөнх хөх тэнгэр минь миний ард түмнийг, миний эх орныг үүрд ивээн тэтгэж байх болтугай. Баярлалаа та бүхэнд ээ” хэмээн мэдэгдлээ.
Ингээд шагайн харвааны асарт зочлон харваачиддаа баярын мэндчилгээ дэвшүүлж, мөн шагай харван цэцээ үзэв.
Ийнхүү Монгол наадам төгөлдөр сайхан үргэлжилж байна.
Мэдээний том зургуудыг дор дарж татаж авна уу
www.president.mn/2012-07-11naadamneelt.rar
