Монгол Улсын Ерөнхийлөгчид Дэлхийн Банкны Дэд Ерөнхийлөгч бараалхлаа
Өнөөдөр Монгол Улсын Ерөнхийлөгч Ц.Элбэгдорж Дэлхийн Банкны Дэд Ерөнхийлөгч ноён Жим Адамсыг хүлээн авч уулзлаа.
Уулзалтын эхэнд Монгол Улсын Ерөнхийлөгч Ц.Элбэгдорж Дэлхийн Банкнаас манай оронд хэрэгжүүлж буй төсөл хөтөлбөрүүд нь олон төрлийн ахиц дэвшил авчирч буйг онцлоод Үндэсний Аюулгүй Байдлын зөвлөл, Ерөнхийлөгч, Улсын Их Хурал, Засгийн Газрын түвшинд тус банкны зүгээс хэрэгжүүлж буй төсөл хөтөлбөрүүдийг дэмжиж ажиллах байр суурьтай байгааг илэрхийлэв.
Мөн Монгол Улсын Ерөнхийлөгч төрийн болон орон нутгийн өмчийн хөрөнгөөр худалдан авах ажиллагааны тогтолцоог улам боловсронгуй болгоход тус банкны зүгээс дэмжлэг хэрэгтэй байгааг дурьдаад ялангуяа яам, агентлагууд бодлого боловсруулах үндсэн үүргээ умартаад харин тендер дүгнэхэд илүүтэй анхаарал тавьж, энэ тал дээр хэтэрхий их цаг зарцуулж байгааг өөрчлөх, худалдан авах ажиллагааны нэгдсэн төв агентлаг байгуулж энэ байгууллагын үйл ажиллагааг олон нийтэд нээлттэй, ил тод байлгах хууль хяналтын байгууллагууд болон иргэдийн хяналтыг энд илүүтэй чиглүүлэх шаардлагатай байгааг цохон тэмдэглэв.
Оюу Толгойн гэрээ байгуулагдсан нь Монгол орны хөгжил дэвшлийг шинэ шатанд гаргах эдийн засгийн том хөшүүрэг болох бөгөөд дараагийн томоохон ордуудын асуудал ч мөн шийдэгдэх болно. Хууль эрх зүйн шударга тогтолцоог бүрдүүлэхгүйгээр ямар ч орлого, ямар ч баялаг ард иргэдэд наалддаггүй, үр дүн байдаггүй хэмээн онцлон тэмдэглэв. Иймд хууль эрх зүйн орчинг боловсронгуй болгох талаар тус банктай хамтран ажиллах шаардлагатай болохыг тэмдэглэв.
Монгол Улсын банкны салбарын хэвийн ажиллагааг хангах, төлбөрийн чадварыг нэмэгдүүлэх, улмаар бодит эдийн засгийг дэмжих бодлого явуулахад Дэлхийн Банкны дэмжлэг ихээхэн хэрэгтэй байгааг мөн дурьдав.
Дээрх ажлын хүрээнд хууль эрх зүйн тогтолцоо, шүүхийн байгууллагын тогтолцоонд ч бас шинэчлэлт хэрэгтэй байгааг хэллээ. Мөн хөдөө аж ахуйг дэмжих, хөгжүүлэх, ойрын ирээдүйд бий болох уул уурхайг дагасан хот суурингуудын эрчим хүч, дэд бүтцийн асуудлыг анхааралдаа авч томоохон төсөл хөтөлбөр хэрэгжүүлэх тал дээр хамтран ажиллах бүрэн боломжтойгоо илэрхийлэв.
Уулзалтын үеэр Дэлхийн Банкны Дэд Ерөнхийлөгч Жим Адамс бүс нутгийн хэмжээнд Монгол Улсыг онцгой анхааран ажиллаж ирснээ дурьдаад өнөөгийн дэлхийн санхүүгийн хямрал Монгол Улсад хүндээр тусч буйг онцлов. Гэсэн хэдий ч Монгол Улс нь Олон Улсын Вальютын Сантай хамтын хөтөлбөр боловсруулж зах зээлийн хүндрэлийн эсрэг идэвхтэй ажилласныг сайшаасан юм. Тэрээр манай улсад үзүүлэх дэмжлэг тусламжийг нэмэгдүүлэх талаар улам бүр хичээн ажиллахаа мэдэгдээд одоогийн байдлаар Дэлхийн Банкны зүгээс нийгмийн халамжийг эмзэг бүлэгт түлхүү чиглүүлэн өөрчлөхөд онцгой анхаарч байгааг онцлон тэмдэглэв. Цаашид Монгол Улс нь зөвхөн уул уурхайгаас олох орлогдоо найдан түргэн хөгжинө гэвэл энэ нэг талаар эндүүрэл гэдгийг ноён Жим Адамс анхааруулав. Тэрээр, уул уурхайгаас олж буй орлого нь улс төрчдөд нийгмийн халамжийг өсгөх сайхан далим болж байгаа нь богино хугацаанд үр дүнтэй мэт боловч урт хугацаанд сөрөг үр дагавар үүсгэдгийг дэлхийн олон орны жишээ харуулдаг болохыг дурьдлаа. Иймд банкны эрүүл бүтэц, төсвийн зарцуулалтын хянамгай бодлого нь уул уурхайн орлогыг зөв зүйтэй зарцуулахад тус болно гэв.
Уулзалтын төгсгөлд дэлхийн хэмжээнд өргөн цар хүрээтэй үйл ажиллагаа явуулж буй тус банкны төлөөлөгчдөд Монгол Улсын Ерөнхийлөгч талархал илэрхийлэн, цаашид улам бүр амжилттайгаар хамтран ажиллах хүсэлтэй байгаагаа онцолсон юм.
