Улаанбаатар Их тэнгэр
Эрхэм хүндэт зочид оо,
Эрхэмсэг хатагтай ноёд оо,
Монгол түмний Үндэсний их баяр наадмын төрийн дайллагад бидний урилгыг хүлээн авч хүрэлцэн ирсэн Та бүхэнд өөрийн болон гэргий Болормаа, хүүхдүүдийнхээ нэрийн өмнөөс чин сэтгэлийн талархал илэрхийлж хамгийн сайн сайхныг хүсэн ерөөж мэндчилье.
Энэ жилийн наадам билэг дэмбэрэл дүүрэн өрнөж байна. Эзэн Богд Чингэс хааны мэндэлсний 850 жилийн ой энэ жил тохиож байгаа юм. Мөн манай иргэдийн чөлөөт сонголтын үр дүнгээр бүрэлдсэн УИХ болон НИТХ ажилдаа орж байна. Монгол Улсын хувьд их ажил, ирмүүн бүтээн байгуулалтын он жилүүд ирж байна.
Монгол наадам бол улс үндэстнийхээ түүх соёл, уламжлал заншлаар бахархах манай ард түмний баяр цэнгэлийн дээд юм. Манай наадамд оролцож, үзэж сонирхохоор хүрэлцэн ирсэн олон хүндэт зочид, анд нөхөдтэйгөө бид баяраа хуваалцаж байгаадаа туйлын баяртай байна. Монгол Улсын ололт амжилт бол манай сая сая иргэдийн ололт амжилт төдийгүй манай орон, байгууллага, ард иргэдтэй хамтран ажилладаг нийт хүмүүсийн хамтын хөдөлмөр бүтээлийн үр дүн юм.
Энэ үдшийн төрийн дайллагын урилгыг хүлээн авч хүрэлцэн ирсэн эрхэмсэг хатагтай ноёд Та бүхэнд гүн талархаж байгаагаа дахин илэрхийлэхийн ялдам, баяр наадмын энэхүү сүүн хундагыг,
- Монгол улсынхаа хөгжил цэцэглэлтийн төлөө
- Ард түмнийхээ аз жаргалант амьдралын төлөө
- Эрхэмсэг хатагтай ноёдын эрүүл энхийн төлөө өргөе.
2012.07.11.
