УИХ дахь Ардчилсан намын бүлгийн дарга Д.Эрдэнэбат, УИХ-ын гишүүн Ч.Сайханбилэг, УИХ-ын дэд дарга Ч.Улаан, УИХ дахь МАХН-МҮАН-ын “Шударга ёс” эвслийн бүлгийн дарга Н.Батцэрэг, УИХ-ын гишүүн, ИЗНН-ийн дарга С.Оюун нар 2012 оны УИХ-ын сонгуульд хамгийн олон суудал авсан намын дарга Норовын Алтанхуягийг Монгол Улсын Ерөнхий сайдад нэр дэвшүүлэхээр Монгол Улсын Ерөнхийлөгчид өнөөдөр өргөн мэдүүллээ.
Энэ үеэр УИХ дахь АН-ын бүлгийн дарга, УИХ-ын гишүүн Д.Эрдэнэбат хэлэхдээ “Эрхэм Ерөнхийлөгч өө, өнөөдөр бид Үндсэн хуулийн 25.1.6 дахь заалт, Монгол Улсын Ерөнхийлөгчийн тухай хуулийн 12.2 дахь заалтыг тус тус үндэс болгон Монгол Улсын Их хурлын 2012 оны ээлжит сонгуулийн дүнгээр УИХ-д хамгийн олон суудал авсан Ардчилсан Нам УИХ дахь бусад нам эвсэлтэйгээ зөвшилцөөд олонхио бүрдүүлж УИХ-ын гишүүн, АН-ын дарга Норовын Алтанхуягийг Монгол Улсын Ерөнхий сайдаар томилуулахаар нэр дэвшүүлэн холбогдох материалаа таньд өргөн мэдүүлж байна. АН-ын ҮЗХ-ны хурлын тогтоол, АН ИЗНН, МАХН-МҮАН-ын “Шударга ёс эвсэл”-тэй зөвшилцөж байгуулсан хамтарсан тунхаглал, хамтын ажиллагааны гэрээ болон бусад нэр дэвшигчтэй холбогдох баримт материалыг таньд үүгээр хүргүүлж байна. Энэхүү саналыг хүлээн авч УИХ-д оруулахыг танаас хичээнгүйлэн хүсч байна” гэв.
Монгол Улсын Ерөнхийлөгч Ерөнхий сайдыг томилуулах тухай энэ саналыг хуулийн хүрээнд судлан хариу өгөхөө илэрхийллээ.
