Өнөөдөр Монгол Улсын Ерөнхийлөгчийн зарлигаар зарим хүмүүст төрийн дээд шагнал хүртээлээ. Монгол Улсын боловсролын салбарт олон жил идэвхи зүтгэл, үр бүтээлтэй ажиллаж, барилгын инженерийн салбарыг үүсэн хөгжих, мэргэжилтэй боловсон хүчин бэлтгэхэд үнэтэй хувь нэмэр оруулсныг нь үнэлж ШУТИС-ийн зөвлөх, профессор Гончигийн Базарт Монгол Улсын ардын багш цол хүртээв.

Мөн 14-р сургуулийн бага ангийн сургалтын менежер Т.Даваахүү, ШУТИС-ын харъяа Эрчим хүчний инженерийн сургуулийн багш Д.Мандал, Сонсголын бэрхшээлтэй хүүхдийн тусгай 29-р сургуулийн ахмад багш Д.Батхүү нарыг гавъяат багш цолоор, “Ган хийц” ХХК-ний ТУЗ-ын дарга, Ерөнхий захирал М.Даваасүрэн, “Монголын Алт” ХХК-ний Дэд ерөнхийлөгч Д.Дашзэвэг, “Талх Чихэр” ХХК-ний ерөнхий менежер Л.Янжин нарыг Аж үйлдвэрийн гавъяат ажилтан цолоор, Хилийн Цэргийн Дээд Сургуулийн зөвлөх, тэргүүлэх ажилтан Ш.Арвай, ШУТИС-ын харъяа Геологи газрын тосны сургуулийн Геологийн шинжлэх ухааны төвийн захирал О.Гэрэл нарыг Шинжлэх ухааны гавъяат ажилтан цолоор, 2-р эмнэлэгийн эрдэм шинжилгээ, гадаад харилцааны зохицуулагч М.Отгонг Эрүүлийг хамгаалахын гавъяат ажилтан цолоор, Уламжлалт Анагаахын Шинжлэх Ухаан Технологи Үйлдвэрлэлийн корпорацийн клиникийн эмнэлэгийн зөвлөх эмч Н.Төмөрбаатарыг Гавъяат эмч цолоор, Бор-Өндөр үйлдвэрийн уулын цехийн далд өрмийн машины засварчин Я.Сүхбатыг Гавъяат уурхайчин цолоор, Цагдаагийн академийн зөвлөх профессор, криминологийн тасгийн эрхлэгч С.Жанцанг гавъяат хуульч цолоор, Нийслэлийн Тээвэр Зохицуулалтын газрын Ахмадын зөвлөлийн дарга Ч.Доржготовыг Гавъяат тээвэрчин цолоор, Зураач Ч.Базарваань, Монголын радиогийн редактор, тоймч Т.Бямбадорж нарыг Соёлын гавъяат зүтгэлтэн цолоор, Ахмад Архитектор Т.Жадамбааг Гавъяат барилгачин цолоор тус тус шагнасан юм.

Мөн Сүхбаатарын одон, Хөдөлмөрийн гавъяаны улаан тугийн одон, Алтан гадас одон, Хөдөлмөрийн хүндэт медаль, Цэргийн хүндэт медаль, Шударга журам медалиар салбар салбартаа амжилт гаргасан хүмүүсийг шагнав.

Шагнал гардуулах үеэр Монгол Улсын Ерөнхийлөгч Ц.Элбэгдорж хэлсэн үгэндээ: “Эх орон, ард түмэн, төрийн хүндэтгэлийг хүлээж шагнал хүртсэн Та бүхэнд чин сэтгэлийн талархал илэрхийлье.Та бүхэн хийж бүтээсэн их зүйлтэй хүмүүс. Энэ танхимд багш, эмч, зураач, хуульч, геологич, тээвэрчин, уурхайчин, сэтгүүлч, шинжлэх ухаан, соёлын зүтгэлтэн гээд манай нийгмийн амьдралын олон салбарын төлөөлөл болсон бахархам үйлстнүүд хөдөлмөр бүтээлээ үнэлүүллээ. Энэ бол таны төдийгүй, таны хамгийн ойрын хүмүүс, хамт олны чинь хөдөлмөр зүтгэлийн үнэлгээ юм. Бид бүгдэд ажил хөдөлмөртөө эзэн болж эх орон, нийгмийнхээ хөгжил дэвшилд хувь нэмэр оруулах их зорилго байгаа. Цаашид ч та бүхэн төр түмнийхээ итгэлийг даан олон бахархалт үйлсийн эзэн болж чадна гэдэгт итгэж байна. Мөн хойч үеэ хариуцлагатай, бүтээлч иргэд болгож өсгөх өөрсдийн арга туршлага, амжилт бүтээлээ өвлүүлж сурган бэлтгэхэд үлгэр дууриал үзүүлж чадна гэдэгт итгэж байна” хэмээн онцолсон юм.

Дараа нь Монгол Улсын Ардын багш цолоор шагнагдсан Г.Базар Монголын төр, ард түмэндээ зориулж талархлын үгээ хэлсэн юм.