Ерөнхийлөгчийн Тамгын газрын дарга П.Цагаантай ярилцлаа.
-Танаас шууд асуухад, зарим хүн өнөөдөр Олимпод амжилт гаргасан тамирчдад шагналын "хур буух" болов уу гэж бодож байлаа. Гэтэл тийм шагнал гардуулсангүй. Харин Ерөнхийлөгчийн зарлиг хүлээж авах ёслолын ажиллагаа боллоо?
-Тийм. Эх орныхоо алдар нэрийг дэлхий дахинаа цуурайтуулж, олимп болон дэлхийн аварга шалгаруулах тэмцээнээс алт, мөнгө, хүрэл медаль хүртсэн үе үеийн тамирчдын нөр их хөдөлмөр, хичээл зүтгэлийг төр засаг өндрөөр үнэлж, нийгмийн баталгааг нь хангах зорилгоор насан туршид нь сар бүр урамшуулал олгох тухай Ерөнхийлөгчийн зарлиг гараад байна. Энэхүү зарлигийг сонордуулах болон Олимпийн баг тамирчдадаа хүндэтгэл үзүүлэн хүлээн авах ёслол их сайхан боллоо. Төрийн гурван өндөрлөг, хотын дарга ч оролцлоо.
-Лондонгийн олимпод амжилт гаргасан тамирчдаа хэзээ шагнах бол. Гадуур хэвлэлээр болон цахим хуудсуудаар нэг баатар, гавьяатын тааврууд явж байх шиг байна. Энэ талаар зарлиг шийдвэр гарч байгаа юу?
Манай баг тамирчдын сүүлч Лондонгоос өнөөдөрхөн бүрэн буцаж ирлээ. Шагнал урамшууллын талаар холбогдох байгууллагаас ямар нэгэн албан ёсны санал Ерөнхийлөгчийн Тамгын газарт өнөөдрийг хүртэл ирүүлээгүй байгаа. Мэдээж Олимпийн хороо, Биеийн тамир спортын газар гээд холбогдох байгууллагаас санал ирүүлэх байх. Ер нь Монголчууд Олимпийн түүхэндээ нэг олимпоос хамгийн олон медаль хүртлээ шүү дээ.
-Олимпод амжилт гаргасан тамирчдаас шинээр баатар, гавьяатууд төрөхийг олон хүн анхааран хүлээж байх шиг байна?
Миний бодлоор нэгэн биед нэг баатар цол, эсвэл нэг гавьяат цол байхад болох биш үү. Лондонгийн Олимпоос медаль авсан таван тамирчны дөрөв нь гавьяат цолоо хүртчихсэн хүмүүс. Н.Түвшинбаяр маань Хөдөлмөрийн баатар бөгөөд Монгол Улсын Гавьяат тамирчин гэдгийг хүн бүр мэдэж байгаа. Баатар, гавьяат гэдэг нэг удаагийн шагнал, баяр хөөрөөс спортод хөлс хүч, эрүүл мэнд, амьдралаа зориулж, эх орныхоо нэр алдрыг олон улсын тавцанд дуурсгаж, хүүхэд залуучууд, ирээдүй үеийнхэндээ гялалзсан үлгэр дууриал үзүүлсэн тамирчдад маань нийгмийн баталгаа их чухал юм байна гэдгийг Ерөнхийлөгч сайтар ойлгосон учраас л энэ зарлигийг гаргасан. Ингэхдээ биеийн тамир, спортын байгууллага, ахмад болон дунд үеийн тамирчидтай уулзаж, санал бодлыг нь сонсч, судалсан. Дахиад хэлэхэд энэ бол тамирчинд насан туршид нь өгч байгаа урам, урамшуулал.
Энэхүү чухал шийдвэрийг Монгол Улсын Ерөнхийлөгч санаачилж, Засгийн газрын тэргүүн Ерөнхий сайд дэмжсэн. Бас спортын төдийгүй спортод элэгтэй маш олон хүн дэмжиж байгааг онцлон хэлмээр байна.
-Манай улс 1964 оноос хойш олимпод оролцож олон хүн олимпийн медаль авсан байдаг. Энэ хүмүүсээс хорвоогийн жамаар мөнх бусыг үзүүлсэн тамирчид байгаа, тэдний асуудлыг яаж тусгасан бэ?
-Мэдээж тусгалгүй яахав. Олимп, дэлхийн аваргаас медаль хүртсэн зарим тамирчид маань хорвоогийн мөнх бусыг үзүүлсэн. Тухайн тамирчны эхнэр, нөхөр, эсвэл хүүхэд нь хүсэлт гаргавал нэг жилийнх нь урамшуулалтай тэнцэх хэмжээний буцалтгүй тусламжийг нэг удаа үзүүлэх заалт тусгагдсан байгаа. Ер нь спортын амжилт олоход тамирчин, дасгалжуулагчийн хамтын зүтгэлээс гадна гэр бүл, хань ижил, үр хүүхдийн дэмжлэг хамгаас чухал нь ойлгомжтой.
-Бас паралимп байна. Паралимпийн тамирчин ижилхэн урамшуулал хүртэх үү?
-Тэгэлгүй яахав. Нэг зүйлийг тодруулахад зуны олимп, өвлийн олимп, паралимп, мөн олимпийн жин, зайгаар дэлхийн аварга шалгаруулах тэмцээнээс медаль хүртсэн болон ирээдүйд хүртэх тамирчдад энэ зарлиг хамаарна.
-Тамирчид маань урамшууллаа хэзээ авч эхлэх вэ?
-Зарлиг ирэх оны нэгдүгээр сарын 1-нээс хүчин төгөлдөр мөрдөгдөж эхэлнэ. Тамирчдад олгох урамшууллыг жил бүр улсын төсөвт суулган олгож байхаар тусгасан. Урамшуулал авах дүрэм журмыг Төсвийн болон Биеийн тамир спортын асуудал эрхэлсэн төрийн захиргааны төв байгууллагууд гаргаж мөрдүүлнэ. Ирээдүйд төгрөгийн ханш хэлбэлзэж, сулрах бол түүнтэй уялдуулж шинэчлэн тогтоож байхаар зарлигт тусгагдсан. Нэг удаагийн баяр хөөр, хөөсөрсөн магтаал ёслолоос насан туршийнх нь амьдралын баталгаа, амжилтын хөшүүрэг илүү чухал гэдэгтэй хүн бүр санал нийлэх биз ээ.
-Нэг зүйлийг нэмээд асуухад, нэг тамирчин хоёр медальтай бол хоёуланд нь урамшуулал авах уу, эсвэл нэгд нь авах уу?
-Хоёуланд нь авна. Гурван медальтай бол гурвууланд нь авна. Хөдөлмөрийн баатар З.Ойдов гуай олимпийн нэг мөнгө, дэлхийн аваргын гурван медальтай учир дөрвүүлэнд нь оногдох урамшуулал авна. Энэ нь ирэх нэг сараас эхлээд сар бүр 7.5 сая төгрөгийн урамшуулал болж байгаа юм. Олимпийн аварга Н.Түвшинбаярын хувьд Олимпийн алтан медалийн дөрвөн сая, мөнгөн медалийн гурван сая гээд нийтдээ долоон саяыг лав авна.
-Жишээлэхэд Н.Түвшинбаяр сар бүр долоон сая төгрөгийн цалин авна гэсэн үг үү?
-Тамирчдад сар бүр олгох урамшууллын хэмжээг дараах байдлаар тогтоосон.
1.Олимпийн наадмаас алтан медаль хүртсэн тамирчинд дөрвөн сая төгрөг,
2.Олимпийн наадмаас мөнгөн медаль хүртсэн тамирчинд гурван сая төгрөг,
3.Олимпийн наадмаас хүрэл медаль хүртсэн тамирчинд хоёр сая төгрөг,
4.Дэлхийн аварга шалгаруулах тэмцээнээс олимпийн спортын зай, жинд алтан медаль хүртсэн тамирчинд хоёр сая төгрөг,
5.Дэлхийн аварга шалгаруулах тэмцээнээс олимпийн спортын зай, жинд мөнгөн медаль хүртсэн тамирчинд нэг сая төгрөг,
6.Дэлхийн аварга шалгаруулах тэмцээнээс олимпийн спортын зай, жинд хүрэл медаль хүртсэн тамирчинд 500 мянган төгрөгийг сар бүр тогтмол өгөхөөр болж байгаа юм.
-Энэ удаагийн зарлиг, урамшууллын тухайд өөрийн бодлоо хэлэхгүй юу?
-Энэ удаагийн зарлиг бол цаг хугацааны хувьд гурван үед хамаарч байгаа гэдгийг дахин хэлмээр байна. Өнгөрсөн үеийн ард түмний домог болсон шилдэг тамирчид, өдгөө үеийн гялалзсан амжилтын эзэд хийгээд ирээдүйд төрийнхөө дууллыг олимп, дэлхийн дэвжээнээ эгшиглүүлэх маргаашийн тамирчдад маань бүгдэд хамаатай урамшуулал.
Л.МӨНХ "ӨДРИЙН СОНИН" 2012-08-17.
