Монгол Улсын Ерөнхийлөгч Ц.Элбэгдорж өнөөдөр ОХУ-д суух Онц бөгөөд Бүрэн эрхт Элчин сайд Д.Идэвхтэнд ОХУ-ын Ерөнхийлөгч В. А.Медведевт барих итгэмжлэх жуух бичгийг гардууллаа.
Хөрш ОХУ-тай харилцаа, хамтын ажиллагаагааг хөгжүүлэх асуудал Монгол Улсын гадаад бодлогын тэргүүлэх чиглэл болохыг Ерөнхийлөгч Ц.Элбэгдорж дурдаж, ОХУ-ын Ерөнхийлөгч Д.Медведевийн Монгол улсад хийсэн айлчлалын үеэр ярилцан тохирсон зүйлийг хэрэгжүүлэх талаар идэвхитэй ажиллахыг Элчин сайдад зөвлөв.
Монгол-Оросын эдийн засгийн харилцааг цаашид гүнзгийрүүлэхэд саад тотгор болж буй өр, зээлийн асуудлыг ойрын хугацаанд шийдэх, Монгол Улсаас ОХУ-д мал аж ахуйн гаралтай бүтээгдэхүүнийг боловсруулан гаргах асуудлаар дорвитой ахиц гаргаж ажиллах шаардлагатай байна хэмээн Ерөнхийлөгч онцлов.
Мөн ОХУ-д амьдарч буй монгол иргэдийн хууль ёсны эрх ашгийг хамгаалахад дэвшил гаргах, ОХУ-ын бүрэлдэхүүнд багтаж буй монгол гаралтай буриад, халимаг улсуудтай соёл хэлхээ харилцаагаа өргөжүүлэхэд анхаарч ажиллахыг зөвлөв.
МУ-ын Ерөнхийлөгч өнөөдөр мөн ХБНГУ-д суух Онц бөгөөд Бүрэн эрхт Элчин сайд Б.Даваадоржид , ХБНГУ-ын Ерөнхийлөгч Хөрст Көлерт барих итгэмжлэх жуух бичгийг гардууллаа.
Монгол Улсын хувьд Европ дахь хамгийн том түнш болсон ХБНГУ-тай эдийн засгийн харилцааг хөгжүүлэх, ялангуяа Германы технологийн хөгжлийг Монголд нэвтрүүлэх талаар онцгой анхаарах хэрэгтэй тухай Ерөнхийлөгч Ц.Элбэгдорж зөвлөлөө.
Герман бол хөдөө аж ахуйн боловсруулах үйлдвэрлэлээр дэлхийд тэргүүлдэг орон тул энэ чиглэлийн хөрөнгө оруулалтыг нэмэгдүүлэхэд анхаарах хэрэгтэй гэсэн юм. Тус оронд ажиллаж амьдарч байгаа олон мянган монголчуудын эрх ашгийг хамгаалах чиглэлээр ажиллах ёстойг ч мөн сануулсан. ХБНГУ-д суралцах монгол оюутны тоог нэмж, уул уурхай, хөдөө аж ахуйн чиглэлийн боловсон хүчнийг бэлтгэхэд анхаарах хэрэгтэй гэж Ерөнхийлөгч Ц.Элбэгдорж онцоллоо.
