Монгол Улсын Ерөнхийлөгч Цахиагийн Элбэгдорж энэ сарын 21-25-нд улсынхаа дархан хилийг эргэж, говийн бүсийн хилийн зарим отряд, застав, хил хяналтын байгууллагын ажил байдалтай танилцав. Тэрбээр Замын-Үүд дэх хилийн цэргийн 0108 дугаар анги, 0129 дүгээр ангийн Элсэн Даравгайн застав, Улаан уулын отряд, 0143 дугаар ангийн Сайн сүүжийн застав, Сулин хээрийн застав, Гашуунсухайтын хилийн боомт, Шивээ хүрэнгийн хилийн боомт, Овоотын отряд зэрэг Дорноговь, Өмнөговь аймгийн нутагт орших анги салбарууд, хил хяналтын байгууллагуудаар орж, нийт 3000 гаруй км зам тууллаа.
Ерөнхийлөгч эхлээд Дорноговь аймгийн Замын-Үүд суманд хүрэлцэн очиж, авто замын шалган нэвтрүүлэх боомт болон лаборатори, Замын-Үүд дэх гаалийн газрын чингэлэг шалгах рентген тоног төхөөрөмжийн гаалийн хяналтын үйл ажиллагаатай танилцлаа. Улмаар бүс нутгийн түвшинд тулгамдаад байгаа асуудлуудыг биечлэн сонсов. Замын-Үүд дэх Засгийн Газрын бүрэн эрхт төлөөлөгч Ч.Баатарын танилцуулснаар, Замын-Үүдийг Эдийн засгийн чөлөөт бүс болгох асуудлыг түргэтгэх, тус бүс нутагт цэвэр усны байгууламж болон дулааны цахилгаан станц нэн даруй байгуулах, Замын-Үүд, Сайншанд чиглэлийн авто замыг барьж эхлүүлэх, Замын-Үүдэд хотын статус олгох, боломжгүй бол төсвийг нь Дорноговь аймгаас тусгаарлах, шинээр цэцэрлэг, сургуулийн барилгыг өргөтгөх зэргийг төрийн бодлогоор дэмжиж нэн даруй шийдвэрлэх хэрэгтэй аж.
Ерөнхийлөгч Замын-Үүдийг хөгжүүлэхэд онцгой шаардлагатай олон ажил бий, гэхдээ хамгийн чухал нь бүс нутгийн удирдлагуудын санал, санаачлага юм гэдгийг онцоллоо. Мөн тус орон нутагт гар аргаар алт олборлож байгаа иргэдийн зохистой үйл ажиллагааг хангах чиглэлээр аймгийн удирдлагуудын авч хэрэгжүүлж буй ажлыг сайшаагаад “Алтны бичил уурхай”-н жишиг уурхай байгуулах санал тавьсан юм.
Дараа нь Ерөнхийлөгч Ц.Элбэгдорж хилийн цэргийн 0108 дугаар ангид зочиллоо. Тус анги 2002 оноос отряд болон өргөжиж Замын-Үүд сумын Борхойн тал гэдэг газарт байрлан улсын хилийн 810-819 дуаар тэмдэгт хүртэл 27.9 км хэсгийг хариуцан хамгаалж байна. Төрийн тэргүүн уг отрядын “Дайчин алдрын танхим”-д зочилон хилийн заставын үйл ажиллагаа, техник, тоног төхөөрөмжтэй танилцан хилчдийн концертыг үзэж сонирхоод цаашаа Хил Хамгаалах Ерөнхий газрын хилийн 0129 дүгээр тусгай ангийн “Шовгор ширээт”-ийн хилийн харуул болон “Элсэн дарвага”-ын нэгдүгээр хилийн заставт зочлон хилчидтэй уулзаж санал хүсэлтийг нь сонсов. “Улаан уулын хилийн отряд” буюу 0129 дүгээр анги нь 1936 оноос хойш өнөөг хүртэл 1900 гаруй хил зөрчигчдийг илрүүлэн асуудлыг хуулийн дагуу шийдвэрлүүлжээ.
Харин хилийн цэргийн 0143 дугаар ангийн “Сайн сүүж”-ийн заставынхан Төрийн тэргүүнийг айлчлах үеэр гэрээт хилчний албыг хэрхэн зохион байгуулж байгаагаа танилцууллаа. Энэ үеэр цэргийн жагсаал, гардан байлдааны дадлага сургуулилт болж, Ерөнхийлөгч уг арга хэмжээг үзэж сонирхоод цааш Хангийн хилийн боомт болон “Сулин хээр”-ийн 0168 дугаар ангид зочилсон юм. Тэрбээр улсын дархан хилээ манаж буй дайчин цэрэг эрстэй энгийн яриа өрнүүлж, урмын үг хэлж явав. Төрийн тэргүүн цаашид хилчдэд тулгамдаж буй асуудлуудыг бодлогын түвшинд шийдвэрлэж, хил хамгаалалтын зарим арга зүйг боловсронгуй болгох ёстойг онцоллоо.
