Монгол Улсын Ерөнхийлөгч Цахиагийн Элбэгдорж өөрийн нь урилгаар Монгол Улсад төрийн айлчлал хийхээр хүрэлцэн ирсэн Бүгд Найрамдах Индонез Улсын Ерөнхийлөгч эрхэмсэг ноён Сусило Бамбанг Юдоёонотой төрийн ёслол хүндэтгэлийн гэр өргөөнд өнөөдөр уулзав.
Монгол Улсын Ерөнхийлөгч Ц.Элбэгдорж эрхэмсэг зочинд урилгыг нь хүлээн авч Монгол оронд төрийн айлчлалаар хүрэлцэн ирсэнд талархал илэрхийллээ.
Хоёр орны харилцаа олон улсын нийтлэг зарчмуудад тулгуурлан хөгжиж байна. Эрхэмсэг Ерөнхийлөгч таны айлчлал хоёр ард түмний уламжлалт, нөхөрсөг харилцааны түүхийг баяжуулж, харилцан ойлголцлыг бэхжүүлэн харилцаа, хамтын ажиллагааг шинэ шатанд гаргана гэдэгт итгэж байна хэмээн Ерөнхийлөгч онцлон тэмдэглэв.
Монгол Улс Индонезтой Зүүн өмнөд Ази, Ази-Номхон далайн бүс нутаг дахь уламжлалт түншийн хувьд бүс нутгийн улс төр, эдийн засгийн олон талт харилцаанд хамтран идэвхтэй оролцож, харилцан бие биеэ дэмжинэ гэдэгт итгэлтэй байгаагаа мөн дурдав.
-Индонез улстай дэд бүтэц, хөдөө аж ахуй, эрдэс баялгийн гээд олон салбарт хамтран ажиллах боломж байна. Ялангуяа нүүрсний экспортын бодлого, зохицуулалтын хүрээнд хамтран ажиллах сонирхолтой байна.
Монгол Улс Ардчилсан орнуудын хамтын нийгэмлэгийг даргалж байгаа бөгөөд БНСУ-ын Ерөнхийлөгчтэй хамтран Ардчиллын төлөө Азийн түншлэлийн санаачилга гаргасан. Индонез улс энэхүү санал санаачилгад нэгдэнэ гэдэгт итгэж байна. Энэ оны эцсээр хамтын нийгэмлэгийн Гадаад харилцааны сайд нарын анхдугаар зөвлөлдөх уулзалт хийхээр төлөвлөж байна. Түүнд Индонезийн Гадаад харилцааны сайд оролцоно гэдэгт найдаж байна. Ирэх оны дөрөвдүгээр сарын 29 болох Ардчилсан орнуудын хамтын нийгэмлэгийн сайд нарын долдугаар уулзалтад Индонез улс оролцохыг урьж байна.
АСЕАН, ЭҮНХ-ний үндэслэн байгуулагч гишүүний хувьд, эдийн засгийн хэмжээгээрээ дэлхийн топ 20-ын нэгийн хувьд Индонез улс хөгжиж буй болон бүс нутгийн орнуудын дуу хоолойг төлөөлөх чухал үүрэг гүйцэтгэж байна. Манай хоёр орны харилцаа ардчиллын нийтлэг үнэт зүйлс, хүний эрх, эрх чөлөөнд тулгуурлан хөгжиж байгаа бөгөөд бүс нутагтаа болон олон улсын хэмжээнд ардчилал, түүний үнэт зүйлсийг бэхжүүлэхэд хамтран ажиллах хүсэлтэй байна. Түүнчлэн АСЕАН-ы орнуудтай харилцаагаа хөгжүүлэх, Зүүн Азийн дээд хэмжээний уулзалтад оролцох, АСЕАН-ы яриа хэлэлцээний түнш, АПЕК-ийн гишүүн болохыг эрмэлзэж байна. Үүнд Индонез улс дэмжлэг үзүүлнэ гэдэгт итгэж байна гэж Ерөнхийлөгч хэллээ.
Индонезийн Ерөнхийлөгч Сусило Бамбанг Юдоёоно хэлэхдээ “Монгол Улс бол агуу их түүхтэй орон. Энэ оронд айлчилж байгаадаа баяртай байна. Ардчилсан орнуудын хамтын нийгэмлэгийг даргалж, Азийн түншлэлийн талаар дэвшүүлсэн санал санаачилгад нэгдэхэд бэлэн байна. Шууд ардчиллын төсөл, Ардчиллын төлөө Индонезийн нийгэмлэг хүний эрх, эрх чөлөө, хуулийг дээдлэх явдлыг эрхэмлэн авлигын эсрэг зогсож байгаа. Эрхэмсэг ноён Ерөнхийлөгч таныг тааламжтай үедээ Индонезид айлчлахыг албан ёсоор урьж байна. Хоёр орны хооронд эрчим хүч, уул уурхай гээд эдийн засгийн олон салбарт хамтран ажиллах том боломжууд байна” гэв.
Монгол Улсын Ерөнхийлөгч Ц.Элбэгдорж хоёр орон Элчин сайдын яамдаа харилцан нээхийн чухлыг дурдаад манай улс олон улсын энхийг сахиулах хүчний ажиллагаанд идэвхтэй оролцож байгаа бөгөөд энэ чиглэлээр бас хамтран ажиллах хүсэлтэй байгаагаа илэрхийллээ. Ярианыхаа төгсгөлд Ерөнхийлөгч эрхэм зочноо Монголд тавтай морилохыг хүслээ.
Ёслолын уулзалтад УИХ-ын гишүүн, Гадаад харилцааны сайд Л.Болд, Ерөнхийлөгчийн Тамгын газрын дарга П.Цагаан, албаны бусад хүмүүс байлцав.
Мэдээний том зургуудыг дор дарж татаж авна уу
http://share.gogo.mn/z0T5a74qat99381346915175/2012_09_06.rar
Мэдээний дүрсийг дор дарж татаж авна уу
http://share.gogo.mn/WeRwEBXezt66801346916125/2012-9-6%20ailchlal%20dvrs-1.wmv
