Төрийн ордны их танхимд өнөөдөр Монгол Улсын Ерөнхийлөгчийн санаачилгаар ЕТГ, “Шууд ардчилал” хүрээлэнгээс зохион байгууулж буй “Шууд ардчилал” иргэдийн оролцоотой төсвийн менежмент үндэсний сургалт нээлтээ хийлээ. Тус сургалтад Улаанбаатар хотын дүүрэг хороодийн төлөөлөл болсон 1100 гаруй иргэд оролцож байна.
Ерөнхийлөгч Ц.Элбэгдорж бүрэн эрхийнхээ бодлого, үйл ажиллагааны хөтөлбөртөө “Иргэн төв”-тэй бодлогыг үндсэн зарчмаа болгож төвлөрлийг сааруулах, шийдвэр гаргах бүхий л түвшинд иргэдийн оролцоог нэмэгдүүлэх, төлөөллийн ардчилалаас шууд ардчиллын үндэсний тогтолцоог бүрдүүлэх, төрийн бодлогод тусгах тодорхой ажлуудыг эхлүүлээд байгаагийн нэг нь өнөөдрийн Шууд ардчиллын үндэсний хэмжээний сургалт болж буй юм.
Энэ удаагийн сургалт нь хоёр үе шаттай бөгөөд 9 дүгээр сарын 8-нд Улаанбаатар хотын иргэдэд, 9 дүгээр сарын 15-нд 21 аймгийн бүх сумдаас төлөөлөл болон ирэх 1000 гаруй иргэдийг хамруулан зохион байгуулагдаж байгаагаараа онцлог юм.
Шууд ардчиллын хамгийн чухал баталгаа нь иргэд өөрсдийн оршин суугаа газрынхаа төсвийг хянаж, байгаа суугаа газар бүртээ өөрсдийн оролцоотой төр засгийн шийдвэр гаргах боломжоос эхэлдэг. Тийм ч учраас ирэх оны 1 дүгээр сарын 1-нээс мөрдөгдөж эхлэх Төсвийн шинэ хуулийг хэрэгжих эхлэхээс өмнө иргэд маань дээрх хуулийн дагуу ямар эрх боломжтой, мөн дээрх хуулийн онцлог, ач холбогдлыг мэдэж авах нь чухал юм.
Өнөөдөр зохион байгуулагдаж буй Сургалтыг ЕТГ-ын дарга П.Цагаан нээж, НИТХ-ийн дарга Д.Баттулга үг хэлэв.
Сургалтын үдээс өмнөх хэсэгт Монгол Улсын Ерөнхийлөгчийн зөвлөх Л.Дашдорж “Иргэдийн оролцоотойгоор Төсвийн хуулийн хэрэгжилтийг зохион байгуулах нь” сэдвээр, МУИС-ийн ЭЗС-ийн багш, доктор (PhD), дэд проф. А.Энхбат “Төвлөрлийг сааруулахад иргэдийн оролцоог дэмжих үндэсний дунд ба урт хугацааны стратегийн бодлогын баримт бичиг”-ийн тухай танилцуулга сэдвээр, Монгол Улсын Ерөнхийлөгчийн зөвлөх Ч.Сосормаа “Иргэний танхимаар дамжуулан оролцоог хангах нь” сэдвээр, Швейцарийн Шууд ардчиллын институтийн захирал, доктор, профессор Андреас Ауэр “Швейцарийн шууд ардчиллын туршлагын тухай” сэдвээр, УИХ-ын гишүүн, ССАЖ-ийн сайд Ц.Оюунгэрэл “Нийтийн зар мэдээг түгээх журам”-ын тухай танилцуулга сэдвээр тус тус хичээл заав.
Үдээс хойшхи сургалтын хэсэгт НИТХ-ын ажлын албаны Иргэний оролцооны хэлтсийн дарга Б.Баттүвшин “Хорооны дүрэм”-ийн тухай танилцуулга, “Хорооны Иргэдийн нийтийн хурлын дэг”-ийн тухай танилцуулга сэдвээр, УИХ-ын гишүүн бөгөөд Сангийн сайд Ч.Улаан “Орон нутгийн хөгжлийн сан”-гийн тухай танилцуулга сэдвээр, Шууд ардчиллын хүрээлэнгийн захирал А.Саруул “Орон нутгийн иргэдийн санал хураалт”-ын тухай танилцуулга сэдвээр, Монгол Улсын Ерөнхийлөгчийн зөвлөх Л.Эрхэмбаяр “Орон нутгийн эрх мэдэл, хариуцлагын тогтолцоог боловсронгуй болгох нь” сэдвээр тус тус хичээл заах бөгөөд сургалтын төгсгөлд Нийслэлийн засаг дарга бөгөөд Улаанбаатар хотын захирагч Э.Бат-Үүл үг хэлэх юм.
Дараа нь Монгол Улсын Ерөнхийлөгч Ц.Элбэгдорж оролцогчдын төлөөлөлд “Шууд ардчилал” иргэдийн оролцоотой төсвийн менежментийн боловсролын анхан шатны сургалтын гэрчилгээ гардуулж нийт оролцогчдод хандан үг хэлэх юм.
