Тус албан тоотод:
Монгол Улсын Их Хурал 2010 оны Улсын төсвийн тухай хуулийг батлахдаа төвлөрсөн төсвийн хөрөнгө оруулалтын зарим хэсгийг Улсын Их Хурлын сонгуулийн тойргийн зарчмаар 76 тэрбум төгрөгийн хөрөнгө оруулалтын асуудлыг шийдсэн нь Монгол Улсын Үндсэн хууль, Төсвийн тухай хууль болон бусад хуулийг зөрчсөн байж болзошгүй хэлэлцүүлэг нийгэмд өрнөж байна.
Улсын Их Хурлаар 2010 оны Улсын төсөв хэлэлцэж байх үед Монгол Улсын Ерөнхийлөгч Улсын Их Хурлын нэгдсэн чуулган дээр 2009 оны 11 дүгээр сарын 09-ний өдөр хэлсэн үгэндээ "...энэ төсвийн хэлэлцүүлгээс харахад гишүүдийн мөнгө гэсэн зүйл сонсогдохгүй байна. Энэ бол сайшаалтай хэрэг" гэж тэмдэглэж, энэхүү зарчмын бус хандлагыг таслан зогсоохыг анхааруулж байсан билээ.
Улсын Их Хурлын зүгээс Засгийн газарт тавих хяналтыг үгүйсгэж, төрийн дээд байгууллагуудын эрх үүргийн хуваарилалтыг гажуудуулсан, Үндсэн хуулийн үзэл санаа, агуулгатай зөрчилдөж байсан буруу хандлага дахин давтагдах ёсгүй гэж үзэж байна.
Улсын Их Хурлын баталсан 2010 оны Улсын төсвийн тухай хуулийн ёсчилсон эхийг Ерөнхийлөгчийн Тамгын газарт ирүүлээгүй байх тул Ерөнхийлөгч одоогоор энэ хуулийн тухайд эрх зүйн үнэлэлт дүгнэлт өгөх боломжгүй байна.
Иймд тойргийн зарчмаар шийдсэн байж болох хөрөнгө оруулалтын талаар тодорхой эрх зүйн үндэслэл бүхий тайлбарыг надад нэн даруй ирүүлнэ үү.
