Монгол Улсын Ерөнхийлөгчид Норвегийн парламентын Дэд Ерөнхийлөгч бараалхав
Норвегийн Вант Улсад албан ёсны айлчлал хийж буй Монгол Улсын Ерөнхийлөгч Цахиагийн Элбэгдоржид тус улсын парламент буюу “Стортинг”-ийн Дэд Ерөнхийлөгч Ахтар Шаудри бараалхав. Уулзалтын эхэнд Стортингийн Дэд Ерөнхийлөгч “Хүний эрх, эрх чөлөөг дээдэлсэн нийтлэг үнэт зүйл бүхий Монгол Улсын Ерөнхийлөгч манай парламентад зочилж буйд талархал илэрхийлье” гэлээ.
Монгол Улсын Ерөнхийлөгч хэлэхдээ “Манай хоёр улс дипломат харилцаа тогтоосноос хойш хоёр орны парламент хоорондын харилцаа маш идэвхтэй хөгжиж ирсэнд баяртай байдаг. Өнгөрсөн хугацаанд, 1990 оноос хойш хоёр улсын парламентын тэргүүнүүд харилцан айлчилж өдгөө энэ харилцаа улам бүр бэхжиж байгаа нь сайн хэрэг” гээд 2012 оны зургаадугаар сард болсон УИХ-ын сонгуулийн үр дүн, Монгол Улсад өрнөж буй шүүх эрх мэдлийн шинэчлэлийн талаар дэлгэрэнгүй танилцуулав.
Стортингийн Дэд Ерөнхийлөгч Ахтар Шаудри “Ардчиллын үнэт зүйл бол хамгийн чухам. Тэрхүү үнэт зүйлийг Азийн тоталитар дэглэмтэй байсан оронд буй болгож эрийн цээнд хүргэх нь бүр ч амаргүй. Ардчиллын үнэт зүйлийг амьдруулахад удирдагчийн манлайлал зайлшгүй чухал. Таны манлайл дор Монгол Улс цаазаар авах ялаас бүрэн татгалзахад бэлэн болоод байгаад баяртай байна. Таны Киргизийн парламентад хэлсэнчлэн бид бусдад заах бус, туршлагаа хуваалцах хүсэл эрмэлзэл дүүрэн байдаг. Одоогоос 100 орчим жилийн өмнө манай улсад эмэгтэйчүүдийн улс төрийн оролцоо, сонгох сонгогдох эрхийг хуулиар нээлттэй болгосон юм. Монгол Улсад ч мөн эмэгтэйчүүдийн нийгэмд эзлэх байр суурь, улс төр дэх оролцоо таны тууштай дэмжлэгийн дор өсөн нэмэгдэж байгаад баяртай байна.
Бид 30-40 жилийн турш нийгмийн баялгийг зохистой хуваарилахад чиглэсэн туршлага хуримтлуулсан. Энэ туршлагаа та бүхэнтэй сэтгэл харамгүй хуваалцахдаа баяртай байх болно. Манай хоёр улс хэдийгээр хүн ам цөөтэй жижиг улс боловч дэлхийн хэмжээнд эрх чөлөө, хүний эрхийн талбарт хүчтэй дуу хоолой болж чадна гэж бодож байна. Тухайлбал авлигын эсрэг тууштай тэмцэх нь ч ардчиллыг бэхжүүлэхэд томоохон дэмжлэг, тод дуу хоолой болох юм” гэлээ.
Уулзалтын төгсгөлд Монгол Улсын Ерөнхийлөгч Ц.Элбэгдорж хэлэхдээ “Ард түмний сонголтоор бүтсэн төр албан тушаалтан, эрх мэдэлтний төлөө биш ард түмнийхээ төлөө л үйлчлэх ёстой. Өнөөдөр бид энэ зарчим дээр байгаа. Монгол Улсын хувьд бид өөрсдийн туршлагаасаа бусадтай идэвхтэй хуваалцаж байна. Эмэгтэйчүүдийн эрхийн тухайд бид түүхийнхээ улбааг харахад л бүсгүйчүүд төрийг тохинуулж, эрчүүдтэйгээ эн зэрэгцэн зүтгэж байсан уламжлалтай ард түмэн. Тиймээс Монголд эмэгтэйчүүдийн улс төрийн оролцоо улам бүр өсөн нэмэгдэнэ гэдэгт итгэж байгаа” хэмээв.
Монгол Улсын Ерөнхийлөгчид Норвегийн парламентын Дэд Ерөнхийлөгч бараалхав
