“Ардчилалд суралцах хамгийн зөв зам бол, бага байхаасаа ардчилал, хүний эрх, эрх чөлөөний тухай боловсрол, мэдлэг олж авах явдал” гэж Монгол Улсын Ерөнхийлөгч Ц.Элбэгдорж өнөөдөр хэллээ. Тэрээр, монголын хүүхдүүдэд ардчилал, хүний эрх, иргэний нийгмийн талаар боловсрол олоход нь тусалж байгаа Америк багш нартай уулзах үеэр ингэж хэлсэн юм.
Монголын Иргэний боловсрол төв, Америкийн багш нарын холбоотой хамтран “Дэлхийн ардчиллын дурсамжийн сан” төслийг удахгүй эхлүүлэх гэж байгаагаа Ерөнхийлөгчид танилцууллаа. Энэ төслийн хүрээнд 20 жилийн өмнө Монгол Улсад ардчиллын үйл хэргийг гардан хийсэн удирдагчид, тэр үеийн ардчилсан хувьсгалын лидерүүд болон гэрчүүд, оролцогчдын дурсамж яриагаар ном бүтэх юм байна. Гэхдээ номыг бүтээгчид нь хүүхдүүд байх бөгөөд, тэд түүх нийгмийн багшаасаа авсан мэдээлэл дээрээ үндэслэн, өөрсдөө ардчиллын амьд гэрчүүдтэй уулзан, нийтлэл, ярилцлага бэлтгэх юм байна.
АНУ-ын Багш нарын холбооны удирдлагууд болох ардчилал, хүний эрх, иргэний боловсролын чиглэлээр мэргэшсэн доктор Стэфэн Шейхтер, Аляскаас ирсэн түүх, иргэний боловсролын багш Рожер Миллер нар энэ төслийн хүрээнд, монголын 27 сургуулийн багш нарт туслах гэж байна.
“Төрийн бодлого дахь иргэний оролцоог нэмэгдүүлэх зорилгоор ардчилсан нийгмийн үнэт зүйлс болсон хүний эрх, эрх чөлөө, эрх тэгш байдал, хууль дээдлэх ёс зэргийг иргэдэд бага наснаас нь эхлэн ойлгуулах шинэ хичээлийг сургалтын хөтөлбөрт оруулах тухай Таны анхны зарлигийг сонссон. Ардчиллын талаар мэдлэг боловсролтой иргэн л ардчилсан нийгэмд зөв амьдарч, удирдаж чадна гэдэг таны яриатай санал нэг байна” гэж Рассел Сэйж коллежийн багш, улс төрийн шинжлэх ухааны профессор С.Шейхтер ярилаа.
