Өнөөдөр Монгол Улсын Ерөнхийлөгчийн зарлигаар Монгол Улсад өрнөсөн ардчилал, хүний эрх, эрх чөлөө, шударга ёсыг тогтоох, иргэний нийгмийн оролцоог нэмэгдүүлэх, парламентат ёсыг төлөвшүүлэх, төрийн болон төрийн бус байгууллагуудын чадавхийг бэхжүүлэх, нутгийн өөрөө удирдах ёсыг хөгжүүлэх, ардчилсан үнэлэмжийг бататгахад оруулсан хувь нэмрийг нь үнэлж АНУ-ын Сан Франциско хот дахь “Алтан хаалга дахь Монголын нөхөд” ТББ-ын Удирдах зөвлөлийн гишүүн ноён Шелдон Северингхаус болон ХБНГУ-ын Конрад Аденауэрийн сангийн суурин төлөөлөгч асан ноён Вернер Проол нарыг “Алтан гадас” одонгоор шагналаа.
Ноён Шелдон Северингхаус нь Азийн Сангийн Монгол дахь суурин төлөөлөгчөөр ажиллаж байсан бөгөөд ноён Вернер Проол нь өдгөө Сант Марал сангийн зөвлөхөөр ажилладаг.
Шагнал гардуулсныхаа дараа Монгол Улсын Ерөнхийлөгч дээрх зочдыг хүлээн авч уулзан “Та бүхний Монгол Улсад ардчиллыг төлөвшүүлэхийн төлөө хийсэн бүхэнд Монголын ард түмэн байнга талархаж явдаг бөгөөд 20 жилийн түүхтэй Монголын ардчилал бол аль нэгэн улс төрийн хүчний ололт байгаагүй, нийт ард түмний, бүх Монголчуудын ололт байсан” гэж онцлон хэллээ.
Шагнал гардаж авсан зочид ч Монгол Улсын нэр хүндтэй шагнал гардаж авсандаа сэтгэл өндөр байгаагаа илэрхийлээд цаашид ч Монгол анд нөхдийнхөө төлөө их зүйлийг хийх болно гэдгээ онцлон хэлж байлаа.
